Dan Lasanble Nasyonal |21 October 2021
Manm i siport demann pour gouvernman revwar kalite lakaz ki i pe konstrir ek kriter alokasyon
En mazorite manm Lasanble in sa semenn donn zot sipor en mosyon ki pe demann gouvernman pour revwar son polisi ek stratezi lo kalite lakaz ki i pe konstrir e lo kriter alokasyon sa bann lakaz e osi bann kare later.
Sipor pour sa demann in vin atraver en mosyon table par manm Lasanble pour Grand Anse Mahé, Waven William, ki’n dir ki sa mosyon i pran an kont fitir devlopman sekter rezidansyel e lekspektasyon nasyonal lo size lakaz ek later.
Onorab William dan son prezantasyon ti fer resorti ki sa mosyon in vin a en moman apropriye kot apre ki in annan en sanzman gouvernman i osi annan nesesite pour revwar bokou lezot keksoz e enn i zisteman sa ki sa mosyon pe demande.
Me menm sa Onorab William in admet ki bann gouvernman oparavan in fer en kantite lakaz e demark en bon pe kare later ki bann fanmir Seselwa in kapab aste me i dir in annan osi moman kot sa bann pratik pa’n byen ganny fer e labi in antre.
I ti sit plizyer parmi bann diferan proze lakaz ki’n ganny entrodwi pandan bann lannen e zot enkli flat, social housing, semi-detached, self-help, condominium, proze 24/24, bann diferan lòn, lakaz emergency, transit houses…
Onorab William i dir tou sa bann proze i demontre evolisyon dan sa domenn me osi bann diferan problenm ki bann fanmir i pas atraver. Donk sa nesesite pour gouvernman revwar polisi ek stratezi vizavi kalite lakaz ki i pe konstrir.
Onorab William in osi dir ki bann lakaz ki’n ganny konstrir pandan bann lannen oparavan in osi annan diferan kalite problenm ki’n vin avek parey ki annan pour fer avek drenaz, desarz ki koul dan larivyer e dan lanmer ler gro lapli i tonbe e i annan linondasyon, planifikasyon ki pa’n byen kalkile e ki ankor pe persiste ozordi.
«Ozordi avek teknolozi nou bezwen amelyor fason ki planifikasyon ek devlopman bann diferan proze i ganny fer. Ozordi osi i annan sa nesesite pour revwar bann lagreman ki’n sinyen par bann dimoun ki pe aste e bann ki pe lwe zot lakaz. Sa i akoz serten kondisyon dan sa bann lagreman nepli relevan,» Onorab William in dir.
I’n fer resorti ki bann fasilite esansyel parey lasanser, emergency exit pa egziste dan bann housing estate e i osi annan bokou ki napa en landrwa pour zanfan zwe.
«Osi lontan ki lotorite konsernen ki konstrir lakaz e fer alokasyon later pa konsilte bann dimoun dan lotorite distrik, zot pa pou fer en bon travay,» Onorab William i dir.
I’n osi met lanfaz lo nesesite pour annan plis lekleraz dan bann vilaz e landrwa park bann transpor e osi nesesite pour annan en landrwa kot bann dimoun i kapab grat zot pwason, e osi lav zot lenz akoz in fer resorti ki pa tou dimoun ki annan en masin lave.
Administrasyon bann housing estate i osi en problenm pour bann responsab ki pa kapab enplimant kondisyon lagreman ki bann lokater in sinyen parey respekte lord ek lape, adres bann nwizans, netway bann landrwa komen… parmi lezot ankor.
Fason bann lakaz emergency i ganny konstrir i osi bezwen ganny revwar e lokater dan sa bann lakaz pa kapab reste pour plis letan ki zot devret. Avek pri konstriksyon ki pe kontinyen ogmante, i annan serten materyo pli abordab ki kapab servi e tousala i bezwen ganny revwar pour fasilit bann fanmir ki pe aspire pour konstrir zot prop lakaz.
Bokou manm ti entervenir lo sa mosyon e zot tou zot ti fer resorti zot bann pwen pour e kont sa mosyon e osi zot bann rezervasyon.
Pour dirizan zafer gouvernman Onorab Bernard Georges, sa mosyon i tous tou dimoun ki annan en responsabilite dan distrik e ki lakaz ek later pa pou zanmen ase pour bann demander ki kontinyen ogmante dan bann distrik e enn fwa pour tou gouvernman i bezwen rod en fason pour rezourd sa bann problenm asosye avek sa size.
Pour fer sa i dir gouvernman i bezwen fer keksoz dan en fason diferan. Parey Onorab William li osi in admet ki bann gouvernman oparavan in fer bokou lakaz pour nou bann dimoun en keksoz ki i dir personn pa kapab rennyen.
«Me nou bezwen sanz nou krwayans ki se gouvernman ki bezwen kontinyen fer lakaz pour dimoun. Gouvernman ti bezwen entervenir dan lepase akoz mannyer sitiasyon ti ete e ti annan en gran mank me ozordi nou bezwen bouz lo en lot nivo. Gouvernman i bezwen sorti dan konstriksyon tou lakaz me plito reste dan konstriksyon zis en serten kategori lakaz,» Onorab Georges in dir.
Apre ki i ti’n koz lo bann diferan kalite lakaz ki gouvernman pe konstrir ozordi, Onorab Georges ti dir i krwar ki gouvernman ozordi pa ke konstrir social houses me plito pe fer bann lakaz ki lo menm nivo avek bann ki sekter prive pe konstrir. I dir nouvo polisi i bezwen fer distenksyon ant social housing ek lezot proze lakaz.
«Gouvernman i annan responsabilite fer social houses e pa devret sibvansyonn lezot proze lakaz ki sekter prive i kapab envestir ladan.
I ti azoute ki i devret annan diferan kalite lakaz pour fer li pli fasil pour ofer dimoun dapre zot mwayen e kapasite finansyel e in propoze ki gouvernman i konsider en serten private public partnership kot i donn later e les kontrakter fer konstriksyon, vann e retir zot larzan.
I’n fer resorti ki avek en sistenm kot dimoun i propriyeter son prop lakaz, tou sa bann problenm ki egziste ozordi parey in detaye dan sa mosyon ava ganny rezourd enn fwa pour tou.
Marie-Anne Lepathy