STC hypermarket i selebre 6-an legzistans |04 October 2021

Dimoun ki ti desann kot ipermarse (hypermarket) Seychelles Trading Company (STC) Sanmdi pase, ti ganny sans partisip dan bann aktivite promosyon e benefisye rediksyon dan pri serten marsandiz.

Sa bann aktivite promosyon ek rediksyon dan pri ti’n ganny organize pour lokazyon 6enm lanniverser sa ipermarse ki ti tonm Sanmdi menm.

Sa gran nonm dimoun ki ti kot sa ipermarse ti ganny sans aprann enpe lo sa kanpanny pri rekonmande (Recommended Retail Price – RRP) par bann staf ki ti’n stasyonnen otour en latab, ranpli avek sa bann prodwi STC ki zot pri in fini fikse. Dan sa kanpanny RRP osi, STC dan plas servi ‘sticker’, in enprim son logo ek pri lo sis komodite (bwat ek pake dile anpoud, pake disik, pake min, pake papye twalet, boutey delwil, pake dipen) pour benefis kliyan.

Anndan dan ipermarse, ti annan promosyon lo lasos tomat (Soleil) kot sa ki ti aste de boutey ti ganny en ‘T-shirt’ Safa.

‘Gift Boutique’ ti annan son pti kado ki i ti pe donn son kliyan ki ti pe ‘shop’ tandis ki dan ‘Café’, sa ki ti la pe detann ti ganny en pti gato anplis. Me an zeneral, tou kliyan ki ti depans plis ki R2000 ti ganny en tiket lotri kot tiraz pou ganny fer ozordi, Lendi le 4 Oktob.

Se dan en lanbyans mizikal avek en DJ ki sa ipermarse ti fet son lanniverser ansanm ek son bann kliyan ziska 7er diswar ler i ti ferm son laport.

Dapre sef ‘marketing’ dan STC, Betty Underwood, zot ti pe servi sa lokasyon pour renouvle zot langazman anver zot kliyan e osi kontinyen sansibiliz zot lo bann prodwi STC, sirtou sa bann ki dan zot kanpanny RRP e ki a en pri vreman redwi.

I ti azoute ki STC i anvi ki son bann kliyan i kontinyen vwar sa ‘hypermarket’ konman sa landrwa kot zot pou ganny tou zot bann komodite e a en pri byen abordab.

I ti fer remarke ki menm si bann pri i abordab, kalite bann komodite i o e sa se akoz STC pa konpromet kalite avek pri.

I ti osi fer remarke ki detanzantan ti annan bann promosyon kot ‘hypermarket’ e sa pou kontinyen.

Manmzel Underwood ti dir ki STC dan son bann progranm RRP pe mentenir ki sa bann prodwi i ganny vann a sa bann pri lo Mahé, Praslin ek La Digue.

I dir ki avek defi ki Covid-19 in anmennen, STC pe kontinyelman vwar son bann pri komodite desann e sa pe ede pour fer kou lavi desann osi.

Patrick Joubert