Kominike Lapolis |14 September 2021
Sispe dan bann lensidan kas lakaz Anse Royale ek Au Cap i paret ankour
Lapolis in raporte ki sa sispe ki ti’n ganny arete dan lensidan arive Anse Royale Zedi swar ek Au Cap Dimans granmaten, in ganny anmenn ankour yer e Lakour in ordonnen ki i retourn ankor demen pandan lazournen. Antretan lapolis i kontinyen avek zot lanket.
En lot sispe dan kas lakaz i ganny sarze
En zonm 44-an ki reste Ma Joie e ki’n fek sorti prizon pour santans asosye avek lofans kas lakaz osi byen ki vole, in ganny sarze e rimann Vandredi dan trwa diferan lensidan parey ki’n arive kot serten lakaz Union Vale, Mont Buxton ek Ma Joie ant le 12 a 30 Out.
Swivan lanket, lapolis in reisi rekiper serten propriyete vole dan 2 ka e lapolis i dir ki zot annan ase levidans dan sa trwazyenm ka.
Sa aprezan akize ki ti ganny arete Zedi i ekspekte reste lo rimann ziska son bann ka i fini ganny ekoute. I pou repas devan Lakour Mazistra dan 14 zour.
Santacha Nourice aze 15-an i ankor touzour manke
Lapolis i ankor pe lans lapel e pe demannSantacha Nourice aze 15-an (ki nou vwar dan sa portre) pour silvouple kontakte son paran irzan.
Santacha in kit lakour son paran Barbarons depi Vandredi le 10 Septanm 2021, ver 7er bomaten e ziska prezan son paran pa konnen kote i ete.
Lapolis pe demann nenport endividi ki konnen oubyen annan lenformasyon kote Santacha Nourice i kapab ete pour kontakte stasyon lapolis Anse Boileau lo limero telefonn 4288110 oubyen son sant komann lo 4288000. Lapolis i oule rapel manm piblik ki i en lofans pour kasyet se zot zanfan anba laz.
