Lasanble i aprouv lamannman dan Lalwa Leta Sivil |12 July 2018

Byento gouvernman pou kapab ranmas enpe larzan lo bann fre ki dimoun i pey  bann zofisye Leta Sivil pour marye zot an prive.

Sa i pou posib la ki Lasanble Nasyonal in aprouv serten lamannman dan Lalwa Leta Sivil.

Sete Minis responsab Lanplwa, Imigrasyon  ek Leta Sivil Madanm Myriam Telemaque ki ti prezant sa prozedlwa pour amann Lalwa Leta Sivil 1991 dan Lasanble Nasyonal Mardi.

Lalwa Leta Sivil i sa morso lalwa ki gouvern lanrezistreman nesans, lanmor, sanzman non ek selebrasyon maryaz.

Dan son prezantasyon lo sa prozedlwa Minis Telemaque ti dir sa lamannman dan Lalwa Leta Sivil 1991 i annan pour bi reponn bezwen ek lekspektasyon piblik ki’n evolye pandan sa bann dernyen lannen, rektifye defayans ki egziste ansaki konsern koleksyon peyman asosye avek ladministrasyon maryaz sivil e osi regilariz sitiasyon konsernan allowances pour bann zofisye ki administre sa bann maryaz.

Lamannman ki ti’n propoze i demande ki lartik 76(1) e 76(2) i amande pour enkli en propozisyon ki a permet minis konsernen pour inisye direktiv ek regilasyon ki ava asir lenplimantasyon efikas bann provizyon anba sa lalwa.

Alor Lartik 76 (1) i ava amande pour permet ki okenn demann pour selebre en maryaz sivil dan en lokasyon prive i ganny akonpannyen par peyman en fre ki pou al dan consolidated fund. Sa lamannman i fer provizyon pour ki sa zofisye ki administre maryaz i ganny peye en allowance pour sak maryaz. Tandis ki lartik 76(2) i endike ki sa allowance ki sa zofisye i resevwar pa pou ganny pran an kont letan son benefis i ganny determinen apre son retret.

Lartik 164 ek 165 i donn minis sa manda pour inisye okenn direktiv, regilasyon ou mezir enkli bann fre ek allowance ki devret peye anba sa lalwa.

Minis Telemaque ti fer resorti ki aktyelman se bann lazans vwayaz ki pran kontakt avek bann zofisye Leta Sivil pour fer laranzman pour sa bann maryaz e en pri i ganny determinen e Leta Sivil i donn zot en sertifikasyon me gouvernman pa ganny nanryen ladan.

Fodre dir ki tou maryaz ki deroul kot biro Leta Sivil anvil napa okenn fre pour peye.

Letan i ti pe eksplik rezon deryer nesesite pour sa bann lamannman Minis Telemaque ti eksplike ki Lalwa Leta Sivil Sesel i an egzistans depi 1883 e pandan tou sa letan lanrezistreman sa bann levennman in fer dan lofis Leta Sivil ziska bann lannen 1980 letan Sesel ti konmans akey maryaz etranze apre louvertir plizyer gran letablisman touristik isi. Depi sa Sesel in kontinyen ganny promouvwar konman en destinasyon kot touris i kapab vin marye.

“Sa marse etranze in devlop dan en fason tre satisfezan sorti 465 maryaz an lannen 2000 pour ariv 510 an 2005, 981 an 2010, 2321 lannen pase. Nou konstate ki dan sa detrwa lannen pase nou pei in konn en logmantasyon dan kantite etranze ki vin marye Sesel,” Minis Telemaque in fer resorti.

Ti annan bokou deba lo sa bann lamannman e bann manm ti fer resorti ki aprezan  i ava annan plis lord kot i konsern administre maryaz sivil pandan en fonksyon prive akoz konmela napa en pri fiks pour sa bann maryaz ki souvan i deroul swa pandan ou apre ler travay, lo bann zil e dan bann lezot landrwa ki sa koup i deside  e bann zofisye Leta Sivil i bezwen fer bann deplasman a zot prop fre pour al kot sa bann landrwa kot sa maryaz pe fer e souvan zot rankontre diferan kalite  lenkonvenyans.

Lalwa Leta Sivil aktyel i tel ki fer ki sa fre ki kliyan i peye i ganny fer avek sa zofisye ki marye zot e serten manm ti dir sa pa annord me sa lamannman pou regilariz sa e definir klerman fason ki sa peyman pou ganny fer pour fer ki gouvernman osi i ava kapab ranmas enpe reveni lo sa kote.

I annan manm ki ti demande ki i annan en diferans dan pri ki en Seselwa ek etranze i peye pour ganny sa servis an prive, lezot ti demande ki gouvernman i les sa bann zofisye debrouye akoz zot sakrifye zot letan, zot wikenn pour al rann sa servis e les zot sarz zot fre e gouvernman li met en fre minimonm ki sa zofisye i bezwen peye pour al fer sa bann maryaz me pa antre ladan pour kontrol tou e dekouraz sa bann zofisye ki pare pour sakrifye zot letan pour al administre sa bann maryaz.

Ler i ti reponn kestyon e donn klarifikasyon bann manm, Minis Telemaque ti eksplike ki anliny avek sa bann lamannman, son minister pou revwar scheme pour bann zofisye Leta Sivil e entrodwi diferan allowance, zot pou apwent en rezistrar ki pou schedule tou maryaz e nonm bann zofisye ki pou al fer bann maryaz. Pou osi annan provizyon pour anploy bann zofisye Leta Sivil a mitan pour ede fer bann maryaz.

Alafen deba Minis Telemaque ti aksepte plizyer lezot lamannman ki bann manm lo toulede kote ti’n propoze pour fer ki gouvernman i ranmas reveni me ki anmenmtan bann zofisye Leta Sivil osi zot pa perdi dan sa prosesis.