Jahrimba i mark son 40-an avek en ‘best of’ |15 February 2018

Richard Marimba, pli koni konman Jahrimba, in lans en nouvo albonm avek tit ‘Premye Sapit: The Very Best of Jahrimba’.

Sa albonm i aktyelman en konpilasyon tou son bann sanson ki in fer sikse avek dan lepase tel konman ‘Pli Mesan Ki En Lyon’, ‘I Dakor Ek Mwan Akoz’ ek ‘Babylon I Pran Dife’.

Seychelles NATION ti zwenn sa artis pour ganny en pti avan gou sa albonm.

« Monn deside fer sa albonm pour mark mon lanniverser 40-an ki, Bondye pitye, mon pou selebre le 8 Mars,» Jahrimba ti esplike.

I ti osi note ki sa albonm i en non-stop mix savedir ki tou le 31 sanson i swiv kanmarad san arete enpe parey dan en diskotek.

«I en travay ki pa’n zanmen ganny fer isi Sesel. I en mix ki al pour omwen 45 minit e sa in ganny fer par DJ 4Key ki dan mon lekip Ghetto Souljahz,» Jahrimba i dir.

Sa 31 sanson ki aparet lo son ‘best of’ i ganny retire lo son bann albonm oparavan tel konman ‘Vibrasyon Tropikal’ (2005), ‘Zanfan Ghetto’ (2006), ‘Spektakiler’ (2008), ‘Laviktwar’ (2010) e ‘Koumsa Ki Nou Kontan’ (2014).

«Napa okenn sanson lo sa konpilasyon ki’n ganny retire lo mon albonm ‘Douler Lo Zot’ ki mon ti fer sorti an 2016, e sa i akoz nou pe mazin fer en lot proze parey dan le fitir,» Jahrimba ti devwal avek nou zournal.

I fer plis ki 20-an ki Jahrimba pe fer lanmizik. I ti konmans son parkour dan lanmizik avek group ragamuffin tre renonmen Ragga Blastaz an 1996, e apre al solo avek son premye hit single ‘Vibrasyon Kreol’.

Son sikse pli resan ti an Avril lannen pase ler i ti ganny pri meyer artis 2016 ensi ki pri pour swa piblik pandan ‘Cable Tune Award’.

‘Premye Sapit: The Very Best of Jahrimba’ i anvant kot Dam’s Enterprise (Ex Kot Do) ek dan lanmen pour R125.

Fans Jahrimba i osi ganny envite pour lansman ofisyel sa konpilasyon ki pou fer le 3 Mars kot laplenn beach soccer, Roche Caiman.

E.P.