Lenstiti Kreol Sesel i selebre 30-an lakonplisman |27 October 2017

Se Erica Fanchette ki’n fer plis letan servis avek Lenstiti Kreol Sesel (LKS) (30-an) depi son louvertir en 1987 konman en lenstitisyon pour devlop e promouvwar Kreol Seselwa.

Pour en period de-z-an son lofis ti baze kot Minister Ledikasyon, Mont Fleuri, e le 26 Oktob 1989, i ti ofisyelman ganny inogire dan Maison St Joseph ‘Lakaz St Joseph’ dan distrik Au Cap.

Madanm Fanchette ti ganny rekonpanse yer dan en seremoni pour komemor 30-an legzistans LKS. Sa seremoni ti dan form en gran legzibisyon anba tenm ‘Depi Akizisyon ziska Zanbriza’ ki ti’n ganny organize pour demontre lakonplisman sa lenstiti dan promosyon lalang Kreol.

“Depi ki mon ti’n fini mon letid Politeknik, mon’n konmans travay pour LKS. I ti mon premye louvraz.  Depi sa zour, mon’n travay dir pour nobou ariv kot mon ete ozordi. I pa ti fasil, me mon’n kapab persevere dan lavi,» i ti dir.

Pandan sa bann lannen, LKS in etabli li konman en sant resers akademik ek en mezon edisyon, ki fer plizyer letid lo lalang ek kiltir kreol ; son evolisyon, son devlopman, son promosyon ek son difizyon dan Sesel e aletranze, spesyalman rankont ek seminar lo langaz ek literatir kreol.

Sete Minis pour Lazenes, Spor ek Kiltir Mitcy Larue ki ti ofisyelman koup riban pour ofisyelman ouver sa legzibisyon, dan prezans sef egzekitif LKS Flora Ben David, tyermenn bord LKS Bernard Shamlaye, avek plizyer lezot envite.

«Lenstiti Kreol ti ganny kree an 1987 par konviksyon sosyal e politik nou bann dirizan. Zot ti konvenki ki devlopman nou sosyete ek sekirite nou nasyon konman en pep i atraver son lalang ki pou donn li son lidantite konman en pep kreol Seselwa, fyer son lidantite,» Minis Larue ti dir.

I ti azoute ki Sesel ozordi i sa pei lo kontinan Lafrik ki poursantaz son popilasyon ki konn lir ek ekrir i pli o.

«Lentrodiksyon lalang Kreol in osi asire ki bokou nou bann dimoun in ganny sans pour zot devlop non selman zot konnesans me osi zot talan artistik e non ki vin antet se Madanm Regina Melanie ek Jean Joseph Madeleine ki’n fer nou fyer konman poet ek ekriven,» minis ti dir.

LKS i osi fer resers dan devlopman lalang kreol, met anmars e promouvwar progranm edikasyonnel pour promosyon ek devlopman kiltir Kreol an zeneral, parmi plizyer lezot aktivite pour promot nou Kreol.

Madanm Ben David ti osi fer resorti ki LKS ti konmans 30-an pase konman en prosesis ek kreolizasyon en lidantite avek bi pour donn Seselwa en vre lidantite kiltirel ek lengwistik.

«Sa 30-an i osi sa prosesis ek lakseptasyon nou tradisyon, leritaz, langaz, larelizyon, model lapanse ek striktir sosyal en sosyete. En lot eleman sa 30-an sa lenstiti se pa les personn deryer, e sa se lenklizyon.»

LKS i annan en lafors travayer ki konpri katorz manm staf avek en sef egzekitif ki travay dan diferan seksyon parmi seksyon ladministrasyon, younit literatir, younit lalang, sant dokimantasyon, younit tradiksyon, younit grafis e younit marketing.

Pandan seremoni yer ti osi annan sanson par zanfan lekol Au Cap osi byen ki pyes teat.