National Day Fair lo Praslin |26 June 2017

Zil pros i demontre zot progre sosyo-ekonomik

Zil pros ti zwenn ansanm pandan wikenn pour demontre zot bann lakonplisman ek progre sosyo-ekonomik pandan sa bann dernyen lannen.

Sa ti atraver en gran lafwar organize pour konmemor Lazournen Nasyonal ki selebre le 29 Zen.

Sa aktivite ti deroul lo zil Eve Baie Ste Anne Praslin Sanmdi ek Dimans.

Sa lafwar ti ofisyelman ouver Sanmdi bomaten par Minis Dezinyen Macsuzy Mondon ki osi ‘chairperson’ komite organizasyon sa levennman. Seremoni louvertir sa aktivite ti enkli sanson, ladans ek poenm otour tenm sa aktivite par bann zanfan lekol Praslin ek La Digue.

En zenn antreprener dan patisri, Stephen Morgan, ti retras son parkour pour akonplir son rev.

Minis Mondon ti fer resorti langazman gouvernman pour kontinyen fasilit devlopman sosyo-ekonomik lo bann zil pros.

Osi prezan kot sa seremoni ti Prezidan Larepiblik, Msye Danny Faure; Vis-Prezidan Vincent Meriton; Speaker Lasanble Nasyonal Msye Patrick Pillay; manm lasanble nasyonal sa de distrik lo Praslin – Onorab Churchill Gill (Baie Ste Anne) e Onorab William Woodcock (Grand Anse) ‒ osi byen ki La Digue – Onorab Noline Sophola; serten minis ek o zofisye bann diferan minister; serten lezot manm lasanble nasyonal, bann partisipan e en gran nonm zabitan Praslin ek La Digue.

Plizyer lakonpannyen ek endividi ti pe demontre zot bann prodwi ek servis dan bann diferan ‘stalls’ ki ti’n ranpli sa laplenn. Plis ki senkant ‘stalls’ ti’n ganny monte.

Sa ti osi en bon loportinite lavertisman pour bann diferan biznes, ensi ki en sans pour demontre zot prop devlopman entern e lafason ki i afekte kominote sa de zil.

Sa ti egalman en sans pour promot bann diferan pos travay pour fasilit rekritman travayer.

Bann departman gouvernmental osi pa ti’n mank sa sans pour demontre zot bann proze lo Praslin e La Digue, lenstriman travay e devlopman sosyo-ekonomik ki’n gradyelman pran plas lo sa de zil, an relasyon avek zot bann minister respektiv.

Apre seremoni louvertir, prezidan ek son delegasyon ti vizit bann diferan ‘stalls’.

«Mon’n kontan pour partisipe pour montre en pti pe mon bann prodwi sak an papye, sirtou la a en moman kot bann sak an plastik pe al aret ganny servi. Ziska prezan lentere pa tro o parmi bann manm piblik me selman mon mazinen avek letan sa i ava sanze,» Msye Ned Descombes, en antreprener ki fek ouver en biznes bann sak an papye, ti partaze.

‘Stall’ ki ti zener plis lentere, sirtou parmi bann zanfan, ti kot laviasyon sivil (SCAA) kot bokou zanfan ti’n vini pour partisip dan bann aktivite delo ki sa ‘water park’ ti pe ofer ensi ki ‘bouncing castle’.

Lemuria Resort osi avek son seksyon golf ti devlop bokou lentere parmi bann zanfan.

Lotorite planing li ti pe ankouraz manm piblik pour partisip dan en kestyoner pour donn zot lopinyon lo sa plan devlopman Anse Lazio sirtou lo kote konstriksyon en nouvo semen ki pou donn posibilite fer letour Praslin, en plan ki pa ankor finalize.

Pour bann manm piblik ki pa ti kapab prezan kot sa aktivite, SBC ti la pour transmet bann deroulman an direk lo radyo ek televizyon.

Bann manm organizater in eksprim zot satisfaksyon anver montaz sa levennman e sipor ki zot in gannyen, ensi ki partisipasyon manm piblik.

Plitar dan lasware, ti annan en ‘gospel show’ kot bann diferan denominasyon ti partisip avek bann morso sanson ek ladans, swivi par en spektak fedartifis.

Prezidan Faure ti osi prezan kot toulede aktivite sa swar.

Lafwar ti ofisyelman fermen dan en pti seremoni Dimans swar.

Bann portre ki akonpanny lartik i montre en pe bann moman for sa aktivite.

Teks: Nadia Bédier

Portre: Romano Laurence