Dife i parsyelman detri en lakaz Mont Buxton |02 February 2017

En dife ti yer parsyelman detri en lakaz Mont Buxton, dan en landrwa ki apel Coco Rouge Estate.

Se en pti pe apre 4er edmi apremidi ki Lazans Servis Tenny Dife i dir ki zot ti ganny alerte lo sa dife.

Portparol sa lazans Jones Madeleine i dir ki konman zot ti annan en kanmiyon tenny dife ki ti deza dan semen, sa ti permet zot evit sa kantite trafik ki annan sa ler e ariv dan sa landrwa vitman.

En lot kanmiyon e en bowser delo ti osi ganny deplwaye.

Me malgre lentervansyon rapid Servis Tenny Dife, sa pa’n anpese ki premye letaz sa batiman ki annan de letaz e ki ti pe fonksyonn parey en blok flat avek diferan apartman i brile konpletman.

Erezman personn dan sa aparaman trwa fanmiy ki ti pe reste lo premye letaz pa’n ganny blese akoz bann okipan ki ti la ti kapab sorti atan.

En viktim – en madanm – ti sepandan ganny transporte klinik kot in ganny trete pour sok.

Me konman dife in detri tou zot propriete personnel, lotorite distrik pe fer apel avek piblik pour nenport ki donasyon ki kapab ed sa bann viktim.

Pour le moman i pa kler kwa ki’n okazyonn sa dife. Me dapre Msye Madeleine, bann premye eleman lanket i montre ki in konmans dan en lasanm.

Dapre Lazans Servis Tenny Dife, sa i premye dife ase gro ki zot fer fas avek depi konmansman lannen 2017.

Caption: