Profil fermye – Marcel Tirant |27 January 2017

‘Travay lo laferm i anmenn bokou satisfaksyon me fodre ou vreman kontan fer li’ 

Msye Marcel Tirant, en fermye Bel Ombre, pe fer plizyer aktivite agrikol lo en morso later lagrikiltir 2.9 arpan.  I annan 33-an e pour li i dir ki travay lo laferm i anmenn bokou satisfaksyon me fodre ou vreman kontan pour fer sa kalite louvraz sinon napa rannman.

Sa msye ki aze 60-an, in marye e annan trwa garson, i dir i travay avek son madanm a kote li. Msye Tirant li i plante e sonny zannimo e son madanm i plant fler e fer konfitir avek bann diferan fri lokal  tel ki papay, gouyav, zoranz, tomat, prindipei, zannannan, tanmaren, zanmalak e lezot ki i annan lo son laferm. I osi fer asar ek mazavaro.

Son bann konfitir ek asar e i vann partou lo Mahé e menm aletranze.

“Isi mon plant tou keksoz – fri tel ki zoranz, limon, mang, zat, zanblon … e osi en varyete  legim ek gro manze. Gro manze ek fler ki nou vann bazar,” i ti dir swivan en vizit ki nou ti fer lo son laferm.

Ler zot war li neseser zot rod bann zonm zournen pour travay avek zot.

Lo kote zannimo Msye Tirant i annan nef bef ek 75 kabri, ki donn zot lavyann e osi fimyen.

“Mon osi annan kat pentard, detrwa poul lokal e mon osi sonny mous dimyel. Mon kwar mon annan en douzenn bwat. Me selman enn mon garson ki okip sa bann mous dimyel,” Msye Tiran ti fer resorti.

Sa msye ki pasyonnen par travay lagrikiltir i dir i pa’n ganny okenn  formasyon formel .

“Mon’n fer tou par mwan menm. Mon ti mason avan, apre ler mon’n aret travay mason mon’n fer lagrikiltir. Apard ki sa tou bann training mon’n ganny atraver bann zofisye ekstansyon/lagrikiltir,” i ti fer resorti.

Msye Tirant i dir ler ou fer travay lo laferm ou napa bokou letan repo ni letan lib akoz i toultan pe fer en keksoz ki relye avek son travay.

“Mon preski napa letan pour mwan dormi. Toulezour mon louvraz se plante e okip mon bann zannimo. Mon antre dan lakaz 7er/7:30 diswar,” i dir.

I fer remarke ki lo laferm toultan pou annan keksoz pour fer e si ou pa pe plante e okip ou zannimo ou pe dil ek pes, lasesres, mankman serten keksoz ki ou bezwen pour travay e i dir ki sa i toutafe bann keksoz normal.

Msye Tirant, ki pli kontan fer lagrikiltir tradisyonnel, i dir ziska prezan i annanzis shade house e i pa tro kontan bann nouvo teknolozi parey drip irrigation ek lezot e servi zis fimyen ki i ganny avek son bann zannimo e tre pe pestisid.

Madanm Msye Tirant ki li osi i tre pasyonnen avek lagrikiltir i ed son msye bokou e zot rod travayer zournen pour ed zot selman ler zot vwar li neseser sinon zot travay zot tousel. Sa madanm i menm konn fer sarbon e servi en chain saw ler i neseser.