Komisyon Eleksyon pa koupab pour pa respekte lord lakour |25 August 2016

Komisyon Eleksyon pa koupab pour pa respekte lord lakour.

Sete Ziz Durai Karunakaran ki ti donn sa verdik dan mosyon ki Linyon Demokratik Seselwa (LDS) ti’n anmenn an kour kont Komisyon Eleksyon. Sa ti apre ki sa komisyon pa ti’n egzekit en lord enterimer sorti kot en lot ziz – Bernardin Renaud – date le 17 Out 2016. Sa lord tanporer ti’n demande pour tir Linyon Sanzman (LS) ek Lafors Sosyal Demokratik (LSD) lo rezis bann parti politik e lo papye vote. Sa ti akoz sa parti, dirize par Msye Roger Mancienne, ti’n argye ki i ti’n servi Linyon Sanzman pour konteste 2enm tour eleksyon prezidansyel an Desanm 2015 e ki kontrerman avek Lartik 7 Lalwa Parti Politik, LSD i tro pre avek LDS.

Nou a rapel ki dan en zizman prononse Mardi, Ziz Karunakaran ti’n donn tyermenn Komisyon Eleksyon Hendrick Gappy 24er, setadir ziska yer apremidi, pour egzekit sa lord.

Se zisteman prensipalman akoz Msye Gappy ti’n deswit apre retir non sa de parti lo lalis e osi LSD lo papye vote pour eleksyon lezislativ ki pou fer le 8, 9 ek 10 Septanm ki ziz ti deside pour deklar li ek son komisyon non koupab.

I ti osi pran konsiderasyon ki Msye Gappy ti’n dir sou serman ki i pa ti’n konpran sa lord lakour e ti donk deklar li inosan.

«Letan in elimin sa linyorans i ti pran premye loportinite pour obei sa lord,» Ziz Karunakaran ti dir.

I’n anplis ordonn avek Rezistrar Lakour Siprenm pour sel sa fayl konsernan Komisyon Eleksyon e pour donk pa gard okenn rikord kont bann komisyoner. Sa bann rikord pa pou osi kapab ganny pibliye. Sa i dir a permet zot kontinyen dan zot karyer profesyonnel.

Konman en leson dan sa zafer, Ziz Karunakaran ti kanmenm demann bann lotorite pour pa pran bann desizyon ki pa legal, rasyonnel e rezonnab. I ti ilistre sa an sitan Lord Alfred Denning, enn bann pli gran avoka ek ziz Angle ki’n egziste:

«Ou kapab tre o plase, lalwa i par lao ou».

Dan son zizman, i ti azoute ki sa zafer in konsern sa sistenm mazik kot sa trwa brans gouvernman – egzekitif, lezislatif ek zidisyer – i tyek kanmarad e gard sa balans neseser antre zot.

Me sa ki pli enportan i ti azoute, i ki lalwa i ganny respekte.

«Sa ki enportan se respe pour lalwa ki devret ganny mentenir dan en demokrasi. Lotorite i bezwen limenm montre disiplin e bann sitwayen i devret respekte lalwa ek son bann desizyon,» Ziz Karunakaran ti dir, an azoutan ki «san respe pour lalwa, demokrasi pou perdi son sans».

Pandan sesyon an kour yer, ti osi devwale ki en mazorite trwa dan sa senk manm Komisyon Eleksyon ti’n donn zot laprouvasyon pour aksepte lanrezistreman LS ek LSD. Ziz ti alor demann leskiz sa de manm ki ti kont, akoz i ti dir si i ti’n konnen davans zot pa ti pou’n bezwen reponn a refi pour obeir lord lakour.

«Mon swete ki aprezan tou bann manm Komisyon Eleksyon i konn zot drwa konstitisyonnel,» avoka LDS Antony Derjacques ti komante. I ti apre azoute ki i pa ti son lentansyon pour ki sa bann manm i kondann prizon pour pa respekte lord lakour, me ki zot plito egzekit lord ki zot ti’n gannyen depi le 17 Out.

Ziz Karunakaran pou ozordi apremidi donn en desizyon final dan zafer Revi Zidisyer lo lord ki son koleg Renaud ti donnen le 17 Out.

Se ozordi donk ki nou pou konnen si sa lord enterimer pour vin enn permanan e si LS e LSD pou ganny definitivman efase lo Rezis Parti Politik.

Komisyon Eleksyon pe ganny reprezante par avoka Samantha Aglaé dan sa zafer.