Festival Kreol 2015:"Air Seychelles gran gannyan final konpetisyon kanmtole |03 November 2015

Air Seychelles i gran gannyan final konpetisyon kanmtole ki ti fer Vandredi swar dan sant konferans enternasyonal (ICCS).

Sa group ti osi ganny pri pour meyer ladans doub ek meyer kostim.

Dezyenm ti Labank Barclays, ki ti osi gannyan pour meyer ladans.

Seychelles Broadcasting Corporation (SBC) ti sorti trwazyenm.

Ti annan antou set group ki ti partisip dan sa final e zot ti pran par dan diferan kalite ladans kanmtole tel ki kotis senp, mazok, ladans doub, avan-de, men-gos, men-drwat.

Dan son pti ladres pour sa lokazyon, Minis pour Tourizm ek Kiltir, Alain St Ange, ti dir annou ansanm reste solider pour gard nou kiltir vivan.

I ti azoute ki i fer li en gran plezir pour vwar ankor en lot konpetisyon ladans kanmtole e ki nou kiltir i sa ki nou annan, ki pour nou.

«Se par nou tou ansanm ki nou pou arive prezerv nou kiltir, protez li, sovgard li e asire ki i reste vivan pour nou bann lezot dimoun ki a vini dan lefitir,» Mnis St Ange ti dir.

Pandan sa sware en liv avek en DVD lo ladans kanmtole standardize ti lanse e enn de morso ladans lo sa DVD ti ganny prozekte sa swar.

Sa standardizasyon i vedir ki tou dimoun i devret dans sa ladans tradisyonnel parey e sa i ganny demontre dan sa liv ek DVD.

Bann partisipan ki’n swiv laklas ladans kanmtole pour 8 mwan ti osi perform sa bann ladans tradisyonnel standardize e resevwar sertifika apre par direkter zeneral pour kiltir, Marcel Rosalie.

Sa sware final konpetisyon ladans kanmtole ti osi animen par resital poenm par diferen poet Seselwa.

Group kiltirel nasyonal ti osi la pour sof lasal ek zot bann sanson ek ladans tre ritme.