Sesel i fer listwar an pibliyan Labib an Kreol Seselwa |29 October 2015

Sesel in zwenn sa pti lalis pei dan lemonn ki’n pibliy Labib dan zot prop lalang nasyonal.

Sa ti ganny devwale Mardi kot Katedral St Paul pandan lansman Labib an Kreol Seselwa par Seychelles Bible Society e le trwa legliz ek larelizyon prensipal dan pei ki’n travay lo sa proze – Legliz Katolik Romen, Legliz Anglikann ek Legliz Advantis.

Konsiltan tradiksyon sa Labib i Dokter Krijin van der Jagt ki ti felisit Sesel pour sa travay e dekrir sa lakonplisman konman en keksoz tre spesyal.

«Mon felisit Sesel pour sa piblikasyon. Seselwa in met zot pei lo sa lalis fame,» Msye van der Jagt ti dir.

Envite doner kot sa seremoni ti Vis-Prezidan Larepiblik Msye Danny Faure, Minis pour Tourizm ek Kiltir Alain St Ange ek son de sekreter prensipal, dirizan lopozisyon dan Lasanble Nasyonal David Pierre, sef tou le trwa legliz, manm lasanble nasyonal, bann tradikter ek kordinater nasyonal e enternasyonl sa proze tradiksyon, reprezantan Seychelles Bible Society ek lezot digniter ensi ki manm piblik.

Pandan ki i ti pe eksplik listwar sa proze tradiksyon Labib an Kreol Seselwa, Msye van der Jagt ti fer resorti ki parmi sa 6,900 ou plis langaz ki annan dan lemonn zis 542 dan ki Labib in ganny tradwir.

I ti annan ankor mo felisitasyon pour Sesel konsernan valorizasyon son lalang Kreol. I ti fer resorti ki parmi sa 100 pei ki koz Kreol dan lemonn, zis 5 ki’n fer sa langaz zot lalang nasyonal e Sesel i enn parmi.

Konsernan tradiksyon sa Labib an Kreol Seselwa, Msye van der Jagt ti fer remarke ki sa pa ti en travay zis enn de lannen. I ti dir ki sa travay i annan en long zistwar deryer li kot tou ti konmans an 1973 – 42-an pase.

I ti dekrir travay lo sa tradiksyon konman en lager ek batay lalang Kreol. Tradikter ti vini, tradikter ti ale. Dernyen-er ti bezwen met dimoun permanan lo sa proze pour kapab konplete.

«Ozordi nou dan lannen 2015. E nou annan en Labib antyerman an Kreol. In ler pour felisit sa bann legliz ki’n travay lo la,» Msye van der Jagt ti dir.

Apre prezantasyon Labib an Kreol ek en konpilasyon gospel lo CD avek bann envite distenge, Vis-Prezidan Faure, Minis St Ange ek Levek Katolik Monsenyer Denis Wiehe ti annan mo remersiman ek felisitasyon pour tou bann ki’n travay lo sa proze.

Seremoni lansman Labib an Kreol Seselwa ti ganny animen par lektir Labib limenm ek sanson spirityel par tou le trwa legliz.

Labib an Kreol Seselwa pou anvant tre byento kot bookshop Seychelles Bible Society dan konpleks Huteau Lane anvil.