Street Party dan Victoria - En gran lafoul i akey lannen 2015 |05 January 2015

Parey bann lannen oparavan, en gran lafoul ti dan karpark Stad Popiler le 31 Desanm 2014 pour akey nouvo lannen 2015.
Sa reveyon ti dan kad aktivite Street Party ki ganny organize tou le lannen.

Bokou dimoun ti’n desann depi byen boner kot la bann vander dan bann stall manze, rafresisman ek bann lezot keksoz ti konmans vin byen okipe.
Spektak mizikal  ti konmans ver 8er diswar e tou ti ale ziska gran maten le premye Zanvye 2015.

Warrior Band e plitar Relation Band ti akonpanny plizyer santer popiler ki ti met laganm lannen pour en lafoul ki ti vreman dan lanbyans lafet.

Ler minwi ti sonnen en leksplosyon lazwa ek tapaz tre for ti rezonnen dan Victoria. Dimoun tou laz, depi zanfan ziska dimoun aze e osi bann etranze ti a pe sote, kriye, danse, sante ek lakontantman kot sanson ‘Ozordi Lannen’ ti a pe rezonnen dan Victoria.

Swe bonn ane ant kanmarad ti partou kote.
Bann transpor dan tou kwen lavil ti ornen pour azout lanbyans pour sa selebrasyon.
Portre ki akonpanny lartik i montre en pe lanbyans sa reveyon.