‘Valer pour mwan, valer pour nou tou’- Mwan Oktob i ganny dedye a ‘Lanmour’ |04 October 2014

Konsey Nasyonal Lazenes (SNYC) in dedye mwan Oktob a valer ‘Lanmour’ dan kad son progranm ‘Valer pour mwan valer pour nou tou’.

Lansman ofisyel sa valer pour sa mwan ti deroul yer apremidi kot Pension Fund Complex Grand Anse Praslin. Me pour onor sa tenm isi lo Mahé, Lakademi Ladefans (SDA) ki baze lo South East Island, ti organiz en demi zournen enteraksyon ek refleksyon lo sa tenm ‘Lanmour’.

Sa ti vwar partisipasyon lo tou nivo depi komandan, lezot o zofisye, solda, brass band ek bann travayer sivil kot sa lakademi.

Tou ti’n abir an rouz ek blan pour onor sa tenm.

Sa demi zournen ti konmans bomaten avek en revi lo valer mwan pase ki ti ‘Lape’. Sa revi ti ganny fer par Mazor Vincent Luther ki komandan SDA.

Apre sa  zot ti al partisip dan en latelye lo definisyon sa tenm ‘Lanmour’ kot zot ti ganny divize an group. Diferan group spesifik ti diskit e prepar en travay dan laform en poenm, pyes teat ouswa desifre sa tenm.

Anviron 2erdtan dan latelye, bann partisipan ti zwenn deor kot ‘sea view’ (zot landrwa detant) pour prezant zot travay ki zot ti’n prepare. La trwa group ti prezant zot poenm lo lanmour, trwa lezot group ti desifre valer ‘Lanmour’  e dernyen trwa group ti anim lodyans atraver zot pyes teat kot riye pa ti manke.

Sa ti fer antou nef prezantasyon.

Apre sak trwa prezantasyon lodyans ti sant en sanson.

Sete apre sa bon moman detant ki tou ti diriz kot mes kot valer ‘Lanmour’ pour sa mwan ti ganny lanse. En plakar avek tenm valer mwan pase ‘Lape’ ti ganny ranplase avek en plakar avek valer ‘Lanmour’ enskrir lo la.

Omonye Lafors Defans Pep Sesel (SPDF) Mazor Louis Agathine ti fer en pti refleksyon e ti fer sa ki prezan mazinen ki zonm ti ganny konsevwar dan lanmour e ki zonm i annan en devwar pour fer sa lanmour rennyen dan zot leker.

Lazournen ti kontinyen avek plis sanson par bann ki ti anvi sante e tou ti fini avek en dezennen dan mes.

Mazor Luther ti dir avek lapres ki depi ler ki SNYC ti lans sa bann valer, kot lakademi zot santi zot angaze pour promouvwar sa bann valer vi ki se zot ki pe antrenn bokou  zenn ki pe zwenn lafors e pourkwa pa enkilke sa bann valer dan sa bann zenn e osi dan lezot travayer kot lakademi.

I ti dir ki sa i osi en fason pou zot tou enterakte e konn pli byen kanmarad.

“Tou sa bann valer ki nou pe selebre i annan pour fer avek nou konman lafors defans. Linite, disiplin, lape, lanmour… tousala nou bezwen konman solda. Akoz san sa bann valer nou pa pou kapab al lager lo fron batay,” Mazor Luther ti dir.

I ti azoute ki i vreman apresye partisipasyon tou dimoun dan promosyon sa bann valer e ki SDA pou kontinyen selebre sa bann valer tou le mwan.

Pour selebre valer ‘Lape’ mwan pase, en travay volonter ti ganny organize kot lakademi.