Lenstiti Kreol i vin enternasyonal |13 January 2014
Lenstiti Kreol ki annan pour manda promouvwar kiltir Kreol, an partikilye son laspe lengwistik e literer, in ofisyelman sanz son stati pour li vin Lenstiti Kreol Enternasyonal.
Se Minis pour Zafer Etranzer Msye Jean-Paul Adam, akonpannyen par Sekreter Zeneral Komisyon Losean Endyen (COI) Msye Jean-Claude de l’Estrac, prezidan Konsey Rezyonal La Réunion Msye Didier Robert e Vis-Prezidan Konsey Zeneral La Réunion Msye Roland Robert ki ti ganny loner devwal plak pour komemor sa levennman kot sa Lenstiti Au Cap, Vandredi apremidi.
Sa aktivite ki ti form parti komemorasyon 30enm lanniverser Komisyon Losean Endyen ti deroul dan prezans Vis-Prezidan Danny Faure, lezot minis, Anbasader Franse Madanm Genevieve Iancu, bann minis zafer etranzer e reprezantan bann pei larezyon ensi ki bann kreolis lokal e etranze.
Lide pour fer Lenstiti Kreol vin enn enternasyonal ti lanse par Prezidan James Michel ler i ti vizit La Réunion an Zilyet lannen pase. Sa proze in kapab realize dan en pti peryod letan avek sipor Konsey Rezyonal e Konsey Zeneral La Réunion.
Avek son nouvo stati, manda Lenstiti Kreol pou dezorme depas plis frontyer lengwistik e literer e agrandi son misyon dan devlopman lakiltir e lar kreol an zeneral e lo en nivo enternasyonal. Lakaz tradisyonnel ki abrit sa lenstitisyon pou osi retourn dan son leta orizinal e pou kontenir en lasal permanan pour sak pei kreolofonn e en restoran tipikman Kreol.
En nouvo batiman avek larsitektir Kreol ki pou servi konman bann biro administratif pou osi konstrir.
Minis pour Tourizm e Kiltir Msye Alain St Ange in dir ki sa nouvo dimansyon Lenstiti Kreol pou kontribye dan devlopman kiltir Kreol lo nivo mondyal.
«Ozordi nou bouz de lavan sa Lenstiti Kreol ki ti pour Sesel tousel oparavan. Ozordi nou pe fer li vin en Lenstiti Kreol Enternasyonal. Se sa dimansyon enternasyonal ki devret fer li reyonn dan en pli gran dimansyon, pour fer li annan bann sesyon travay avek bann entelektyel Kreol, bann ki’n ne pour fer lalang Kreol vwar son plas, pa zis Sesel, me dan lemonn antye. Sesel i deza ekri an Kreol, pans an Kreol, travay an Kreol. Nou fer tou an Kreol. Me bokou lezot zil zot zis koze. Ansanm nou kapab bouze pour fer sa vin plis en realite, sakenn dan son dimansyon, sakenn dan son diversite e an respektan kanmarad,» Minis St Ange ti dir.
Lenstiti Kreol ti dabor kree an 1981 konman sa lepok Seksyon Kreol dan Minister Ledikasyon, avek bi pour revwar e devlop stati lalang Kreol Seselwa. Apre ki Lenstiti Kreol ti’n organiz plizyer kolok refleksyon dan kad Festival Kreol, sa lenstitisyon ti zwe en gran rol dan kreasyon ‘Lasosiasyon Bann Zil Kreol’ an Oktob 1986. Se sa lorganizasyon ki’n alabaz devlopman lakreolite dan la rezyon. Pandan sa menm lannen, Lenstiti Kreol ti ganny plis lotonomi e en manda pli larz pour promouvwar e devlop lalang Kreol.
Pandan Festival Kreol an Oktob lannen pase, Sesel ek La Réunion ti siny en pakt korperasyon ki ti pour formelman met anplas Lenstiti Kreol Enternasyonal.
Apre ki in pandan bokou letan form parti Minister Ledikasyon, Lenstiti Kreol Enternasyonal i aprezan en seksyon dan Minister Tourizm ek Kiltir. Sa i akoz gouvernman in santi ki travay sa lenstiti i tonm plis dan domenn lakiltir.
