Lasanble Lazenes i aprouv de mosyon pour benefis bann zenn |03 December 2013

 Bann zenn manm onorab pandan zot dernyen sesyon

Bann manm Lasanble Lazenes in aprouv de mosyon parmi trwa pandan zot dernyen sesyon ki ti fer resaman kot National House.

Premye mosyon ki ti ganny prezante par Isha Hoareau ti pe propoze ki gouvernman i get dan posibilite desantraliz bann nouvo proze condominium lo nivo bann distrik ki annan ase lespas pour konstriksyon.

I ti dir ki sa i a fer ki sa bann zenn graduates ki pa anvi kit zot distrik a kapab fer en pli bon swa e santi zot pli konfortab.

Sa mosyon ti ganny aprouve.

Dezyenm mosyon ti enn ki ti pe propoze ki Minister Ledikasyon i ogmant lakantite lannen ki lekol lar vizyel i ofer son bann etidyan.

Loter mosyon, Stephanie Augustin, ti dir ki sa trwa lannen pa ase pour en etidyan arive zwenn son target vi ki sa de premye lannen letid i senpleman nivo basic.

Sa mosyon, ki ti ganny segonde par Manuella Morel, pa ti ganny laprouvasyon bann manm sa lasanble.

Dernyen mosyon dan sa sesyon ti pe demande ki tou etidyan Seselwa i siport sa nouvo progranm ki Minister Ledikasyon in entrodwir pour ki bann etidyan S5 ki pa kalifye pour fer legzanmen IGCSE a osi kapab ganny en lot sans pour fer en legzanmen nasyonal ki’n ganny prepare lokalman.

Letan i ti pe prezant sa mosyon zenn Onorab Hoareau ti dir ki sa a fer ki sa bann etidyan alafen zot letid a benefisye avek en sertifika.

Sa enn mosyon ti osi ganny laprouvasyon bann manm lasanble.