En leksperyans lavi lo zil Diego atraver pyes teat kreol |02 November 2013

Manm piblik in ganny sans eksperyans lavi lo zil e en melanz de kiltir atraver en pyes teat avek tit Adieu Diego, Orevwar
Jeline.

Sa pyes ti ganny zwe mardi swar kot lasal Teat Nasyonal Mont Fleuri e in ganny met an senn par group Modesti ki ganny kordinen par Angelin Marie.

Msye Marie in dir ki in pran zot senk mwan pour met sa pyes teat an senn e prepare.

In azoute ki dan sa pyes ti annan 12 akter e aktres e ki serten parmi pa bann manm permanan group Modesti.

Msye Marie in fer resorti ki sa pyes teat in donn son lodyans en leksperyans lavi lo zil ki mannyer ti ete lo en baz toulezour, bann aktivite ki ti deroule, lafason ki bann zabitan ti pas zot letan lwazir e bann diferan konversasyon ki ti deroule.

Sa pyes in montre en melanz kiltir Morisyen e Seselwa lo zil Diego, i ti dir.
«In osi montre ki mannyer en lanmour ti ganny brize lo sa zil ant en zenn koup ki ti zwenn laba,» i ti azoute.

Sa ti en garson nonmen Diego ki ti’n vin lo sa zil ansanm avek son tonton pour vin travay me ki pa ti anvi reste lo sa zil vi
ki i ti annan en lot lanbisyon pour kontiny son letid.

Me son lavi ti sanze letan i ti zwenn en zenn fiy apele Jeline ki ti’n ariv lo zil ansanm avek son tantin.

Zot ti tonm anmoure me ler komander zil, Msye Duval, ti anons tou bann zabitan ki zot ti bezwen kit zil, sa lanmour e sa relasyon ant sa de zenn ti brize. Zot ti bezwen retourn dan zot pei natal kot zot ti’n sorti.

Sa pyes i enn ki relev bokou lemosyon tel ki sagrinasyon e lazwa atraver bann diferan sitiasyon ki ganny fer resorti dan sa
pyes.

Premyer sa pyes teat Adieu Diego, Orevwar Jeline ti enn bann aktivite dan kad 28enm Festival Kreol ki ti terminen Zedi.
Bann portre i montre serten senn dan sa pyes teat tire par nou fotografer Patrick Joubert.

M. B.