En lanmes pour mark Lazournen Manze |21 October 2013

En group travayer ki prodwi manze lokal ti zwenn Sanmdi bomaten kot Legliz Katolik Romen Sen Roch, Bel Ombre pour en lanmes pour mark Lazournen Manze ki ti tonm le 16 Oktob.

Prezan dan lanmes ti Minis pour Resours Natirel, Msye Peter Sinon, son sekreter prensipal, Msye Michel Nalletamby, sef egzekitiv Lotorite lapes Sesel, Msye  Finley Racombo parmi en pti minorite fermye.

Se Pret Colin Underwood ki ti servi sa lanmes  e i ti profite pour dir ki «manze i enn parmi bann sours ki en imen i bezwen pour sirviv, e mon swe se ki nou redwir gaspiyaz akoz mazinen ki en kwiyer manze ki nou zete i kapab vin en lasyet manze pour en lot dimoun»

Apre lanmes bann ki ti prezan ti fer larout pour al kot sant kominoter Bel Ombre pour vwar bazar lavant bann gro manze ki bann vander ti pe vann.

Ti osi annan en legzibisyon ki ti’n ganny monte pour demontre bann diferan metod e materyo ki ganny servi pour prodwir manze lokal.