Kreol Seselwa i antre dan sistenm resers Google |23 February 2011

Sa in vin posib swivan travay kolaborasyon ki Lenstiti Kreol in fer avek Google Africa ki baze Nairobi, Kenya pour enstal sa domenn resers an Kreol dan sistenm Google .

Sa in vin disponib atraver Google Seychelles. Akse avek sa sistenm resers i ekspekte vin operasyonnel sa semenn menm.

Direktris Lenstiti Kreol Madanm Penda Choppy ti fer sa lanons -- ki i ti dekri koman en bon nouvel pour  bann serser, bann etidyan ek bann zenn ki kontan servi Google pour fer resers lo enternet -- pandan en seremoni pour komemor Lazournen Enternasyonal Lalang Maternel Lendi le 21 Fevriye.

Pandan sa menm seremoni Lenstiti Kreol ti osi fer prezantasyon 3 dokiman enportan ki rezilta travay kolaborasyon avek son bann partener.

Sa ti en leksik Panafriken lo bann Terminolozi Parlmanter, en leksik Panafriken lo Fanm ek Devlopman, e en Lakt Kolok ki sa Lenstiti ti organize an 2010.

An sa ki konsern sa 2 premye dokiman, ti an 2005 ki Lenstiti Kreol ti siny en lakor avek Biro Tradiksyon, Gouvernman Kanadyen pour fer en proze kreasyon terminolozi anba tit Proze Teknolengwistik Lafrik. En dizenn pei Afriken, enkli Sesel, pe partisip dan sa proze e depi sinyatir sa lakor, lekip Lenstiti Kreol ek serten manm komite lalang kreol in ganny plizyer formasyon.

Sa bann formasyon in vize ver devlopman abilite sa bann dimoun dan domenn lozisyel leksikal, diksyoner, e terminolozik an servan teknolozi.

Sa 2 leksik i rezilta sa proze.

Sa trwazyenm dokiman -- Lakt kolok ki sa Lenstiti ti organize an 2010 -- ti’n ganny prepare e redize par Lenstiti Kreol e tou bann lezot lenstitisyon tel ki Ledikasyon, Kiltir, Lasante, fonksyon piblik pou nonm enn de i annan zot rekomandasyon ladan.

Sa ti vin apre ki en lodit dan lizaz lalang Kreol dan bann lenstitisyon piblik ti’n ganny fer. Rezilta sa lodit ti ganny prezante pandan kolok 2010 e sa Lakt i konpri tou sa bann rekomandasyon sa lodit.

Touzour konsernan larantre Kreol dan sistenm resers Google, Madanm Choppy i dir sa i en gran laviktwar pour Lenstiti Kreol ensi ki Minister Ledikasyon osi byen ki tou dimoun ki servi sa lalang.

I ti dir ki dan bann semenn ki pe vini, bann itilizater Kreol pou kapab rod lenformasyon lo diferan size dan lemonn an servan Kreol Seselwa koman lalang resers.

An Desanm 2010, biro rezyonal Google, Nairobi, ti apros Lenstiti Kreol, apre ki zot ti’n vwar sit web Lenstiti Kreol ek sit web Festival Kreol, pour ofer en kolaborasyon pour entrodwir Kreol Seselwa dan zot sistenm resers.

Travay ki’n fer pour permet sa arive i tradiksyon tou bann terminolozi ki Google i servi, enkli non bann pei, bann lalang, bann term resers, bann komann, eksetera, dan Kreol Seselwa.

Answit, Google pe fer en travay verifikasyon kot a kot ek Lenstiti Kreol avan i met sa progranm dan son sistenm.

Bann rezon akoz Google Africa in montre lentere pour tradwir bann terminolozi  ki Google i servi an Kreol ouswa lezot lalang nasyonal i akoz i annan lentansyon promouvwar bann lalang nasyonal dan Lafrik an servan siberlespas.

Sa proze pou enn ki pou rantab e vo lapenn vi ki siberlespas i atir bann zenn, etidyan ek bann itilizater tou le zour .

Pour lalang Kreol i en reisit partikilye akoz i ede prouve ki Kreol i kapab ganny servi dan tou domenn teknik ki annan.

Nou lans en lapel avek bann itilizater Kreol pour servi sa progranm e pour travay an kolaborasyon avek Lenstiti Kreol pour amelyor li, Lenstiti Kreol in dir.