Kominike Lapolis-En zonm pe rimann swivan en lenzidan fatal Quincy Village |08 September 2010
Franky Robert Polite ti ganny sertifye mor an arivan Lopital Victoria kot i ti’n ganny transporte pour lasistans medikal.
Dapre rapor i paret ki Polite ti’n tonbe e tap son latet ater swivan en bagar.
Sa lensidan ti ganny raporte avek lapolis ver 9er15 Lendi swar e i ti ariv kot en lakour prive kot Polite ek sa lot zonm ki'n enplike dan sa lensidan ti ete pandan sa letan.
Antretan lapolis pe kontinny son lanket dan sa ka pou etabli vre natir sa lensidan.
Sispe dife lo La Digue pe rimann ziska le 20 Septanm
Sa zonm 42-an ki ti ganny arete Sanmdi konman sispe dan lensidan dife lo La Digue kot Madanm Jeannette Rosalie ti perdi son lavi, pe rimann an detansyon ziska le 20 Septanm, lapolis in raporte.
Sa sispe pe fer fas avek sarz pour lofans met dife par ekspre “arson” e osi pour mert.
5-an prizon pour vol
Dario Delcy, en zonm 18-an ki reste Anse Louis, in kondann 5-an prizon pour vol. Sa lensidan ti ariv Mont Plaisir dan distrik Anse Royale ver 11er bomaten Vandredi le 3 Septanm letan ki Delcy ti antre dan en laboutik, servi en pti kouto pour fer per son viktim – en boutikye – apre vol anviron 10,000 roupi dan kontwar.
Delcy ti ganny arete aswar menm zour e i ti ganny anmenn ankour Lendi kot i ti ganny zize e kondannen.
Dife i detri en loto La Misère
Dife in konpletman detri en loto La Misère Mardi granmaten. Se propriyeter sa loto ki ti enform lapolis lo sa lensidan ver 3er bomaten.
Dapre lapolis e zofisye servis tenny dife ki ti’n ganny deplwaye pour donn lasistans, sa loto ki zot ti’n zwenn an flanm, ti’n park anba en langar obor en stor dan lari son propriyeter – en landrwa ouver trouve obor semen segonder lo ‘Kennedy Road’.
Dapre viktim sa lensidan – en madanm – i ti’n park e ‘lock’ son loto ver 10er45 Lendi swar e i ti ganny reveye par en tapaz ver 2er45 zis pour li vwar son loto, en Hyundai Matrix, valer apepre 200,000 roupi, an flanm.
Lapolis ek departman servis tenny dife pe fer lanket dan sa lensidan.