Lazournen Klib CARE Praslin/La Digue-Praslin pou ganny son prop Sant Reabilitasyon |28 November 2009

Lazournen klib CARE i en lokazyon pour bann manm zenn ansanm

Sete Msye Christopher Gill ki ti fer sa lanons Sanmdi pase dan en rankont pour bann manm klib CARE lo Praslin ek La Digue, kot lekol Baie Ste Anne.

Msye Gill ti pe koz konman en manm bann otelye lo Praslin ki’n met zot ansanm pour esey redwir lenpak ki krim asosye avek sibstans, sirtou drog, pe fer lo sa zil.

I annan en pe letan ki bann otelye lo Praslin i’n zwenn ansanm pour esey fer en keksoz apropo problenm drog lo zot zil.
Msye Gill in dir ki zot pe ganny led avek gouvernman, Legliz Katolik ek CARE.

Sa sant reabilitasyon i ekspekte baze dan ansyen lopital Baie Ste Anne e i pou annan kapasite pour pran 30 dimoun alafwa.
 
Letan i ti pe adres bann manm klib CARE ek zot bann ankadrer, chairperson CARE, Madanm Sarah Rene, ti dir ki problenm lasosyete i konmans depi ler bann zanfan i ankor  tipti, ler zot konmans viv san disiplin, zot konmans ganny bate, zot konmans viv dan lafreyer. I ti fer en lapel avek bann adilt ki travay avek bann zanfan pour gid zot, pa les zot pas atraver sistenm ledikasyon pour 10-an san ki zot konn ekrir zot non.

“I annan en problenm la, napa ase lapartaz, napa ase lanmour,”.
I ti dir si bann adilt i pran en pe plis letan avek bann zanfan ler zot ankor pti sa i ede redwir en kantite bann problenm parey drog ler zot vin pli gran. 

Lazournen klib CARE lo Praslin ti kontinyen avek en seri latelye kot bann manm sa klib in aprann pour fer plizyer keksoz parey tres lapay, kwi manze, penn miray, sport ek lezot ankor ki zot a kapab kontinyen fer ler zot zwenn dan zot klib.

Praslin i annan trwa klib CARE ki baze dan le trwa lekol sa zil, tandis ki La Digue i annan en klib pour lekol primer ek segonder. Antou i annan plis ki 150 manm dan sa 4 klib.

Lazournen bann klib i fer alafen lannen pour tou manm zwenn ansanm.

En kontribisyon