31enm Lanniverser Lendepandans-Gran lafwar artizanal i donn selebrasyon en latous ekstra |02 July 2007

Sef egzekitif SEnPA, Maryse Berlouis, ti dir sa pandan lansman ofisyel sa lafwar lendepandans Sanmdi bomaten, ki SEnPA ti’n organize konzwentman avek Lasosyasyon bann Artizan.

Sa lafwar, ki ti pe met an egzibit selman bann prodwi artizanal kree par bann artizan lokal an servan bann matyer premyer ki trouve isi, ti deroul dan lakour Camion Hall (landrwa lot SEnPA i baze) ek car park ki bord avek stenn taksi.

Menm si son seremoni louvertir ti deroul Sanmdi bomaten, lafwar ti ouver pour piblik ek lezot visiter depi Vandredi swar, pandan ki laplipar aktivite lo progranm pour Lazournen Lendepandans ti pe deroule lo laplenn Freedom Square.

Parmi sa bann aktivite lo progranm Vandredi swar ti enkli en tonbola e en spektak mizikal lo laplenn Freedom Square, kot plizyer artis popiler ti perform bann morso.

Louvertir ofisyel lafwar lendepandans ti deroul dan prezans serten minis e plizyer zofisye o plase dan gouvernman; tyermenn lasosyasyon bann artizan, Jenny Ah-Kong ; Lider bann Zafer Gouvernman dan Lasanble Nasyonal, Marie-Louise Potter; plizyer manm Lasanble Nayonal; ensi ki plizyer manm kor diplomatik.

Pandan seremoni louvertir, plizyer artizan ti ganny rekonpanse pour zefor ki zot ti’n mete pour partisip dan sa lafwar. Manmzel Nathalie Belle ti resevwar pri pour meyer stall parmi bann zenn, tandis ki artis Italyen, Mauritzio, ki ti’n ganny envite isi espesyalman pour sa lafwar, ti resevwar en pri spesyal pour mont en stall model bann kalite travay ki SEnPA i dir i oule ankouraz bann artizan lokal pour fer zot osi.

Mauritzio i ekspekte fer plizyer seminar lo son bann travay avek bann artizan lokal avan son depar.