En madanm i admit lopital swivan en aksidan |22 June 2006

Lapolis in dir ki dapre lenformasyon resevwar lo ‘scene’ aksidan, sa madanm ti ganny transporte lopital san konnesans.

Touzour dapre lapolis, aksidan ti arive apre ki sa loto ki sa madanm ti ladan ti perdi kontrol e apre tap dan sa bis Tata.

Apard sa madanm ki admit, ti annan osi 4 pasaze ki ti dan bis ki’n ganny trete e apre ganny large.

Letan aksidan ti arive sa bis ti pe fer direksyon lavil tandis ki loto ki sa madanm ti pe dray ti pe fer direksyon opoze.

Dan en lot aksidan touzour Merkredi, en transpor servis tenny dife ti tap deryer en pick-up zis avan ariv kot Ron Pwen trafik Roche Caiman. 

Drayer sa pick-up ti ganny transporte lopital kot in resevwar tretman e apre ganny large.
Dapre lapolis, sa transpor servis tenny dife ti pe al asiste lo ‘scene’ sa aksidan Le Rocher letan i ti fer aksidan.