En Dimans leritaz byen zepise |08 October 2005

Sa aktivite, batize Dimans Leritaz, i form parti en nouvo progranm anba Leritaz Seychelles pour atir plis partisipasyon piblik dan bann aktivite tradisyonnel e fer zot vin pli enterese pour konn plis lo zot kiltir.

Sa lazournen ti parfimen avek bann loder zepis Kreol atraver bann pla tradisyonnel Seselwa parey satini reken dan dile koko, sote bred lanmar, ladob, plizyer varyete konfitir ek asar byen pimante, san obliy sa bon dite sitronnel.

Anmezir ki bann viziter ti a pe degiste sa bann bon pla, melodi nou lanmizik tradisyonnel ti pe rezonnen dan ler.

Parmi bann lezot zartifay tradisyonnel ki ti anvant pandan sa lazournen ti larap ek mortye. Ti osi annan en seksyon lo laforz ek travay dife Seychelles.

Dapre Msye Michel Savy, asistan direkter Leritaz Nasyonal, sa aktivite ti osi en bon loportinite pour bann zenn ki pa tro konn zot listwar pour vin partisipe e aprann.

Plan pour organiz lezot aktivite parey, i ti dir, pou depan lo sikse Dimans Leritaz.