Frank Pierre (14.2.1951-25.7.2005)-Kominote mizisyen Seychelles i perdi en lot vedet |30 July 2005
Annefe sete bann manm lasosiasyon Lanmizik San Frontyer ek Children's Choir ki ti anim seremoni lanterman.
Frank, ki bokou dimoun in konn li par son pti non ‘teteloke’, ti rann lam Lendi le 25 Zilyet lopital Victoria a laz 54 an.
Sa santer, mizisyen e konpoziter ki’n enpresyonn manm piblik avek plizyer nimero parey Mon Lavi, Annou Ofer Nou Frer Lanmitye, Mazin Nou, Later Bondye, parmi lezot ankor, ti ne le14 Fevriye 1951.
I ti devlop lentere pour lanmizik a en tre zenn laz e in konn bokou sikse atraver son bann sanson santimantal parey Mwan ek Ou ek Ti Ou Sel Sans. Koman en konpoziter, sa zwer gitar in osi ekrir plizyer sanson pour plizyer artis.
Sa zonm, ki bokou son bann koleg mizisyen in dekrir koman "en farser ranpli avek limour", in osi fer performans dan plizyer letablisman touristik e partisip dan plizyer spektak.
Frank in osi al fer performans dan diferan lotel Bahrain e dapre son fiy, Florence Tambara, i ti menm pe mazin al fer en performans Australie.
Pandan son karyer mizikal ki ti komans an 1968, Frank ti fer sorti 2 CD – Mon Lavi ek The Best of Frank Pierre – e osi en kaset avek tit Pasyans.
Tou dernyenman Frank ti vann CD kot Camion Hall e son dernyen laparans piblik koman en mizisyen ti pandan Street Party Victoria, le 18 Zen sa lannen.
Lo non lasosiasyon Lanmizik San Frontyer, tyermenn Patrick Victor in dekrir lanmor Frank koman en “gran pert pour lanmizik Seychelles.”
In dir ki li osi i ti ganny enspire par Frank pour aprann zwe gitar an azoutan ki Seychelles in perdi non selman en gran santer me osi en gran konpoziter ki’n kontribye bokou dan travay lezot artis.
Patrick in osi dekrir Frank koman en dimoun farser ki ti toultan annan kek zistwar pour rakonte e fer riye dan bann moman tansyon.