Sesel i ganny en lot santener Emilien Nicette |02 August 2021
Msye Nicette ti selebre son 100enm laniverser yer (Portre tire par en manm lafanmir)
Sesel in ganny en lot dwayen, Msye Emilien France Nicette, en zabitan distrik Anse Etoile, ti selebre son 100enm laniverser yer, Dimans le 1er Out.
A ler akyel, Msye Nicette pe reste Pointe Conan avek son nyes, Madanm Wilna Rosalie, ki osi son carer depi 2002.
Madanm Rosalie in dekri son toton, Msye Nicette konman en dimoun tre dou, kalm e ranpli avek konpasyon.
«A plizyer repriz dan okenn diskisyon lafanmir, i pou sa enn ki pou etervenir pour met lape,» Madanm Rosalie i dir.
Msye Nicette, ki annan en zanfan ‒ en fiy ‒, ti konmans travay a en tre zenn az. I ti fer bann travay tel parey labourer, travay lo bato, trenn saret dan lavil Victoria sa lepok, e osi met koltar preski partou lo Mahe. In menm ganny sans deservi son pei Sesel avek fyerte dan larme pour en peryod letan.
Menm si ozordi, avek detrwa pti konplikasyon lasante, Msye Nicette i ankor annan son zwa de viv malgre i aveg e sourd.
Aparaman, i ti kontan manz son lavyann me pour sa dernyen 10-an i prefer sa bon lasoup legim byen ris avek bann morso lavyann ladan.
Malgre i pa’n posib pour nou fizikman partaz sa moman avek Msye Nicette pour rezon lasante, Prezidan Larepiblik, Msye Wavel Ramkalawan, in zwenn ansanm avek Minis pour Gouvernman Lokal e Zafer Kominoter, Madanm Rose Marie Hoareau, pour anvoy meyer swe pour Msye Nicette.
Nou swet li tou de bon, kouraz e bonn sante. Nou remersye Bondye pour sa kado lavi ki in donn li e akord li pour viv ziska sa laz. Petet en laz ki bokou i reve pour arive.
Lo sa not, nou oule osi senserman remersye Msye Nicette pour son servis ek bann bon fason fer dan kominote. Nou asire ki son bann valer in en legzanp pour son fanmir, zanmi e bann ki konn li.
En panyen sorti kot Prezidan Larepiblik ek bann lezot kado lo la par ladministrater distrik ek manm Lasanble Nasyonal Anse Etoile e Minister Gouvernman Lokal in ganny remet avek Madanm Rosalie, pour Msye Nicette.
Sesel i tre fyer pour ganny en lot dwayen.
Lartik kontribye par Kevin Perine, sekreter prensipal pour Gouverman Lokal e Zafer Kominoter