En zonm Digwa i ganny sarze pour lofans ensilte e servi langaz obsenn kont son kanmarad |30 July 2021
Merkredi, en zonm Digwa aze 20-an ti ganny sarze pour lofans ensilte e servi langaz obsenn kont son kanmarad, reziste larestasyon e osi konport li dan en fason dezordonnen dan kordgard.
Sa bann lensidan in ariv La Digue swivan en bagar kot lapolis ti ganny apele pour lasistans.
Apre ganny sarze, ziz Lakour Mazistra in ordonnen ki sa akize in ganny large lo serten kondisyon tel ki: sinny en kosyon 5,000 roupi, pour pa enterfer avek temwen dan sa ka e osi pour pa ganny sarze pour menm kalite lofans pandan ki i deor sinon i pou ganny arete e ganny detenir ziska son ka i fini ganny ekoute par lakour.
2 ka separe pour andomaz propriyete i ganny anrezistre kont en zonm 24-an
En zonm aze 24-an ki reste Foret Noire i ganny rimann par lakour swivan 2 ka separe pour andomaz propriyete.
Premye ka ti arive kot lakour son papa kot in kas laport lakaz tandis ki dezyenm ka ti anrezistre kordgard Mont Fleuri ankor enn fwa pour andomaz en laport sa batiman.
Sa sispe i deza annan 2 sarz tretman vyolans e pe egalman fer fas avek en nouvo tel ka anrezistre resaman kordgard Mont Fleuri.
Lakour in ordonnen ki sa zonm 24-an i ganny rimann prizon Montagne Posée pour li repas ankour le 5 Out.
En zonm i fer fas avek sarz tretman vyolans e andomaz propriyete
Finalman, en lot zonm sorti Casade pe fer fas avek sarz tretman vyolans e andomaz propriyete.
Sa i swiv en lensidan kot sa zonm ti esey anpes enn son frer ganny arete Dimans dan zanmerant bazar sa distrik. Dan sa lensidan sa frer ki ti pe anpes lapolis fer larestasyon ti kraz vit deryer transpor lapolis avek en sopin e apre taye.
Evantyelman tou le 2 frer ti ganny arete, detenir e pas atraver prosedir lanket pour prosekisyon.
Kominike lapolis