Lapolis i lans en lanket dan en ka lanmor sibit |21 July 2021
Lapolis in konmans lanket swivan lensidan kot en madanm aze 95-an, Louise Vel, in tonbe e mor se li Anse Faure, Pointe Larue, Lendi.
Sa lensidan ti ganny raporte avek lapolis ver 12er35 apremidi.
Dapre son carer, en madanm ki pa reste lwen e ki okip madanm Vel, i dir ki ver 11er i ti’n enformen e kit madanm Louise Vel pe get televizyon dan salon en pti moman pour al se li e letan i ti retounen ver midi i pa ti trouv li pe get televizyon. Son carer i azoute ki i ti al get obor kot en vwazen me i pa ti laba. Dan pe kontinyen rod madanm Vel, son carer i dir apre i ti al kot lavarang e trouv li lafas anba ater lo beton ki anviron 3 met oter avek balkon lavarang e i pa ti pe bouze.
Madanm Vel ti ganny sertifye mor ver 13er30 par patolozis ki ti al kot sa lensidan ti’n arive. Lapolis pe fer lanket pour etablir sirkonstans ekzakt e pe esper rezilta letopsi pour konn lakoz son lanmor.
***
Lapolis in fini rikord statement sa 3 endividi dan lensidan Lari Angar
Lapolis in raporte ki in fini rikord statement sa 3 endividi dan lensidan ki ti arive Lari Angar semenn pase.
Touzour baze lo rapor sa lensidan ki ti arive dan lasware le 14 Zilyet, lapolis in sepandan fer resorti ki i pe entansifye son zefor e lalit kont okenn krim serye tel ki tranzaksyon drog ilegal dan pei.
Lapolis in dir ki sa loperasyon ki ti osi enplik diferan younit dan lafors ti enn ki legal e i rezerv drwa pour pa devwal detay plan serten loperasyon ki i fer.
Lapolis in osi azoute ki tanzantan pou annan loperasyon konzwent ek bann lezot partner pour konbat kont sirtou bann ki asosye avek fleo drog e lezot krim organize ki’n enfiltre e pe detri nou sosyete.
Kominike lapolis