Dan Lasanble Nasyonal MNA pour Grand Anse Mahé i severman kondann lesey pour fer eksploze stasyon petrol sa distrik |07 July 2021
Lo non zabitan Grand Anse Mahé, manm Lasanble Nasyonal (MNA) sa distrik, Onorab Waven William, in severman kondann en lesey pour fer eksploze stasyon petrol sa distrik ki si ti’n reisi, ti pou’n okazyonn lanmor, domaz ek dega lo imen ek propriyete.
“Mon oule eksprim nou lapresiasyon pour Lafors Lapolis ek zot servis lentelizans ki’n kapab anpes sa latanta,” Onorab William ti dir devan Lasanble Nayonal yer bomaten.
Msye William ti eksprim sa kondannasyon swivan lanons semenn pase ki 2 zonm ti’n ganny arete avek kemikal eksploziv avek lentansyon pour fer eksploze stasyon petrol Grand Anse Mahé.
I dir ki i avek bokou konsern ek lenkyetid ki en gran mazorite zabitan sa distrik, an partikilye bann ki reste dan zalantour Rivière Seche Estate dan krwaze Grand Anse ek rezyon stasyon BBC, ti aprann sa konplo.
“Nou priye ki nou bann zonm ek fanm dan liniform, avoka ek zidisyer ava les zot ganny gide par nou Kreater dan travay kontinyel pour ganny lazistis.
“Mon oule remersye osi tou bann ki priye nwit e zour pour proteksyon nou distrik, nou pei ek nou bann dirizan e mon demann tou Seselwa pour reste vizilan e pour raport avek Lafors Lapolis ouswa nou dirizan okenn keksoz ki zot soupsonnen i kapab en menas pour lasosyete.”
Msye William i dir ki serten sa bann rezidan ki reste pre avek sa stasyon i ankor tromatize letan zot in aprann sa lesey pour fer sa latak.
Orizinalman, Onorab William ti’n eksprim son lentansyon pour demann Minis pour Zafer Entern, Errol Fonseka, en kestyon lo sa size me Spiker Roger Mancienne pa ti permet sa akoz sa ka i dan lanmen lapolis e Prokirer Zeneral e lanket i ankor pe kontinyen.
Lo son kote Minis Fonseka, ki ti dan Lasanble pour reponn plizyer kestyon bann manm lo diferan size konsernan son minister, ti profite pour reasir bann manm Lasanble e piblik an zeneral ki tou keksoz i anba kontrol e ki zot napa nanryen pour zot enkyet.
Sant Vokasyonnel Ans Norde i dan en leta deplorab
Minis responsab pour lafanmir, Marie-Celine Zialor, in dekri konman deplorab leta Sant Vokasyonnel ki fourni en travay ou aktivite pour bann dimoun ki pe viv avek en dezabilite.
I dir i pa konpran ki mannyer en group dimoun ki sitan spesyal dan nou sosyete in kapab ganny neglize e oubliye pour sitan lontan.
“Nou’n napa swa me nou’n bezwen ferm sa sant apre evaliasyon ki departman Lasante ti fer an Desanm lannen pase e depi sa in annan kat diferan kontrakter ki’n vin evalye e donn zot lopinyon profesyonnel e zot in zizere ki sa landrwa i devret ganny demoli e rekonstrir,” Minis Zialor in dir.
Minis Zialor ti dir sa letan i ti pe reponn en kestyon par MNA LDS Naddy Zialor ki ti’n demann li ki stati e leta sa sant vokasyonnel e ki plan sa minister pour sa sant e ki group dimoun ki pe ganny targete anba Disabled Trust Fund e ki nouvo prosedir pour ganny akse avek sa fon.
Minis Zialor ti fer resorti ki ansemoman departman Lafanmir pe esper rezilta sorti kot Procurement pour konnen lekel ki pou ganny kontra pour vin aranz sa sant dan en fason tanporer pour ki i kapab reouver vi ki bann paran napa en landrwa pour kit sa bann zenn ki bezwen sipervizyon a tou moman.
Me Minis Zialor in dir ki en plan lonterm pour sa sant pa ankor ganny definir e ki zot pou annan en miting sa semenn menm avek Minister Ledikasyon pour deside lekel bout ki pou al avek sa minister akoz i deza annan Lekol Eksepsyonnel ki tonb anba Minister Ledikasyon e sa sant i bezwen ganny revwar dan son totalite pour met li lo en nivo ki akseptab.
Antretan Minis Zialor in osi dir ki reform avek Disabled Trust Fund in deza konmanse e bann kriter e prosedir pe ganny revwar. I annan en nouvo komite avek reprezantan sorti dan diferan sekter ki’n ganny met anplas pour fer sir ki dimoun ki vreman merite ki ganny asiste anba sa Trust Fund.
I’n fer resorti ki peyman dan sa fon in sispann akoz bokou iregilarite in ganny dekouver e tou bann prosedir pe ganny revwar pour asire ki i annan plis lord.
Lo son kote nouvo sekreter prensipal pour departman Lafanmir, Clive Roucou, in eksplike ki sa batiman pa konvenab ditou dan son leta aktyel pour sa bann dimoun avek dezabilite retourn laba. Me i dir ki pli gro problenm la i difikilte ki bann paran pe rankontre avek sa bann zenn ki annan bann bezwen spesifik e bann paran pa pe kapab al travay akoz sa bann zenn i bezwen sirveyans.
“Me nou pe negosye avek bann lezot partener parey lasosiasyon bann dimoun avek dezabilite, Ceps ek lezot avek bi pour kontinyen ankadre sa bann zenn lo en baz tanporer. Departman pe fer son mye pour fasilit sa eleman ganny en landrwa spesifik oubyen fasilit fanmir sa bann zenn pour zot bouz devan,” PS Roucou in dir.
Fodre fer remarke ki sa sant i akomod 36 zenn ek senk travayer.
Marie-Anne Lepathy