En zenn garson i ganny sarze pour 3 diferan lofans |22 June 2021

En garson 17-an ki reste Perseverance 2 in formelman ganny sarze devan Lakour pour bann miner yer pour lofans reziste larestasyon, andomaz propriyete e osi konportman dezordonnen dan kordgard.

Larestasyon evantyel sa akize ti vin apre ki lapolis ti’n resevwar lapel pour lasistans Vandredi le 18 Zen ver 6.30 diswar swivan son konportman agresiv kot lakaz.

Letan i ti pe ganny transporte kordgard sa akize ti andomaz transpor lapolis e kontinyen avek son konportman agresiv e dezordonnen dan stasyon.

Sa Lakour in ordonnen ki sa akize 17-an i ganny large lo serten kondisyon tel ki siny en kosyon 25,000 roupi, i bezwen raport kordgard tou le Lendi, i napa drwa komet okenn lofans parey avan son ka i fini ankour e i bezwen remet son bann dokiman vwayaz avek Lakour.

Prosen dat ki sa akize pou repas ankour i le 8 Zilyet 2021.

Kominike Lapolis