Follow us on:

Facebook Twitter LinkedIn YouTube

Domestic

5 zonm etranze, 1 zonm Seselwa in pas devan Lakour pour lofans drog |22 June 2021

Senk zonm etranze e en zonm Seselwa in resaman pas devan Lakour Siprenm kot zot in ganny rimann e enn parmi in ganny sarze an koneksyon avek lofans lenportasyon en drog kontrole ki tonb apepre en total 3 kilogranm dan 4 ka separe.

Zofisye Biro Anti-Narkotik (ANB) dan Lafors Lapolis Sesel ti aret 4 parmi sa bann sispe apre ki zot ti sey antre Sesel atraver vol Ethiopian Airline avek sakenn en serten kantite drog, sispekte kokain, ki ti ganny detekte dan zot lekor par ANB an partenarya avek zofisye Customs ek Imigrasyon.

Premye pour ganny arete i en Gineen (Guinea Bissau) 44-an avek apepre 500 granm ki li in fini ganny sarze yer le 21 Zen. Konnekte ansanm avek li konman asosye dan sa enn ka, i en Nizeryen (sorti Nigeria) 34-an ki toulede ti antre Sesel le 5 Zen 2021.

Le 7 Zen 2021 en lot sispe aze 42-an, en sitwayen Sierra Leone, ti ganny arete avek apepre 590 granm drog.

De zour plitar, le 9 Zen 2021, en lot Nizeryen aze 50-an ti ganny arete avek apepre 1.2 kilogranm.

Semenn pase le 14 Zen, en Ganeen (sorti Ghana) aze 61-an ti ganny arete avek apepre 775 granm. An koneksyon avek sa Ganeen, ANB ti plitar le 17 Zen aret sa zonm Seselwa aze 42-an sorti dan distrik Takamaka e ki anploye konman en ‘supervisor’ avek en lakonpannyen ki donn servis bann bato kargo.

Zot tou zot ansemoman lo rimann e zot ka i reste aktiv devan Lakour.

 

Kominike sorti kot ANB

 

 

 

More news