Mesaz lider parti United Seychelles alokazyon Lazournen Konstitisyon |17 June 2021
‘Fodre zanmen nou oubliy nesans nou Konstitisyon’
“Pep Seselwa, le 18 Zen nou selebre nou Lazournen Konstitisyon, kot nou osi pe selebre 28-an depi ladopsyon Konstitisyon nou Trwazyenm Repiblik. Nou bezwen note ki:
- Nou Konstitisyon i mirwar nou lalit e i reflekte nou laspirasyon konman en Pep,
- Nou Konstitisyon i osi reflekte nou idantite konman en Nasyon lib e fyer,
- Nou Konstitisyon i sa far ki donn nou direksyon e asir nou drwa fondamantal e laliberte.
“Fodre zanmen nou oubliy nesans sa Konstitisyon, e United Seychelles i fyer ki in en parti enportan dan formilasyon nou Konstitisyon e ki in zwe son rol pour ki premye fwa dan son listwar, Sesel ti ganny en sapit drwa fondamantal imen.
“Nou profit sa lokazyon pour remersye bann “Founding Fathers” nou Konstitisyon; mansyon spesyal pour Msye France Albert Rene ek Msye James Mancham.
“Nou Konstitisyon ti annan pour bi asir lape ek linite, latransparans, reg de lwa, laliberte, egalite e solidarite e lespwar pour lavenir. Fodre ki ozordi tou parti i renouvle nou komitman anver sa bann valer demokratik e defann zot kont bann vye e nouvo menas.
“Nasyon Seselwa i bezwen reste senser anver prensip primordyal anzandre dan nou Konstitisyon e sa ki progre en sosyete i bezwen baze lo prensip kot nou promouvwar e respekte drwa fondamantal nou Pep, lo son byennet moral, spirityel e materyel. An dot mo, nou pe dir ki nou Pep i bezwen kontinyen reste o sant tou devlopman.
“Ozordi i en gran zour pour nou Lepep Seselwa!
“Bonn fet tou Seselwa.”
Dr Patrick Herminie
Lider Parti United Seychelles