Mesaz Minis pour Lafanmir, Zenn ek Spor, Marie Celine Zialor, alokazyon Lazournen Enternasyonal Papa |16 June 2021

Minis Zialor

‘Vin bann model ek lenspirasyon pour bann zenn garson’

“Alokazyon Lazournen Enternasyonnal bann Papa, mon oule pran sa loportinite pour salye e remersye tou bann papa ki pe deservi zot responsabilite dan en fason serye avek lanmour ek konpasyon.

“Mon senserman valoriz sa devwar sakre e nob ki zot annan anver zot fanmir e lasosyete.

“Pour sa lokazyon, mon osi oule anvoy en mesaz pour tou bann ki pa pe pran zot responsabilite, ki napa okenn leskiz pour zot pa zwenn zot lobligasyon anver zot fanmir. Bann ki annan difikilte pa per pour aprose e demann led. Minister Lafanmir ek lezot lazans i la pour siport bann papa ki annan bann defi.

“Pour konklir, mon oule met en laksan tre for lo promosyon ‘En papa responsab’ ; sa i ava dan byennet nou bann zenn garson ek zonm ki zot a kapab vin bann papa responsab dan lefitir.

“Mon pe enplor tou bann madanm pou osi siport bann papa ki pe pran zot responsabilite, e pa aras zot zanfan sa sans ek loportinite pour zot annan en relasyon avek zot papa.

“Bann papa les zot vin bann model ek lenspirasyon ki nou bann zenn garson i bezwen ozordi.

“Bonn fet tou bann papa!”