Lapolis i ouver en lofis tanporer kot biro DA Anse Etoile |15 June 2021

Manm piblik an zeneral, sirtou zabitan distrik Anse Etoile, i ganny enformen ki an kolaborasyon avek lotorite ladministrasyon sa distrik, apartir demen, Merkredi le 16 Zen, lapolis pe tanporerman met an operasyon en lofis (police post) kot biro ladministrasyon Anse Etoile pour fasilit rapor lensidan e menm asiste avek serten servis ki kordgard Anse Etoile ti pe rann zabitan sa distrik oparavan.

Sa biro i trouve kot internet café ti ete kot sant sosyal anfas kort basketball sa distrik.

I pou ouver 24 lo 24 e zofisye ki la pou sa lyezon direk avek stasyon Perseverance ki ansemoman osi responsab pour deservi zabitan e distrik Anse Etoile.

Pwen kontak sa lofis tanporer i 2520188, 4241948 e 4241810.

Kominike Lapolis