En zonm 52-an i ganny trouve mor kot i ti pe travay e reste Grand Anse Praslin |12 June 2021
Letopsi fer lo lekor en zonm 52-an ki ti ganny trouve mor dan lakaz kot i ti pe travay e reste lo Praslin yer bomaten in montre ki lakoz son lanmor ti an rezilta plizyer konplikasyon medikal serye, parmi tansyon o e osi problenm leker.
Sa zonm, Msye Augustin Perrine, ti en zabitan Cascade ki ti pe travay konman sekirite kot OASIS, en letablisman touristik dan distrik Grand Anse.
Sete enn son koleg travay ki ti dekouver li mor dan lakaz pour travayer sa letablisman ver 7.50 bomaten.
Dapre en lot koleg, dernyen fwa ki i ti trouv Msye Perrine vivan ti Mardi bomaten, menm zour ki patolozis in estimen Perrine ti’n kapab mor.
En zonm 28-an i ganny sarze pour kas lakaz e vole
En zonm 28-an ki reste St Louis in formelman ganny sarze sa semenn pour kase, antre e vole dan en batiman dan sa menm distrik mwan pase.
Lakour in ordonnen ki sa akize i ganny rimann prizon Montagne Posée me i kapab ganny large si i pey en kosyon 12 mil roupi ki enn bann kondisyon ki’n ganny enpoze lo li.
Lezot kondisyon enpoze par lakour i pour siny liv lakour kot kordgard santral 3 fwa par semenn e i pa devret okenn par ant 6er diswar a 6er bomaten apard ki kot lakour son manman.
Ziska ler sa akize pa ankor pey sa 12 mil roupi alor i ankor pe rimann prizon.
Kominike Lapolis