Follow us on:

Facebook Twitter LinkedIn YouTube

Domestic

Monsenyer Harel i satisfe avek kontribisyon bann fanmir pour ed li ekrir kontinyasyon son let pastoral |11 June 2021

Kantite, kalite ek profonder bann larepons sorti kot bann fanmir ki Levek Dyosez Port Victoria Monsenyer Alain Harel in gannyen pour ed li kontinyen ekrir en lot sapit son let pastoral in vreman sirprenan.

Ti pandan en lanmes spesyal dan Legliz Sainte Famille de Nazareth Grand Anse Mahé le 16 Me pour mark Lafet Lasansyon, ki ti osi konmemor Lazournen Lafanmir, ki Monsenyer Harel ti demann sak fanmir pour reflesir lo trwa kestyon –Ki bann lazwa ki nou viv dan nou fanmir menm si nou fanmir pa parfe? Ki bann soufrans, difikilte ki nou pe viv dan nou fanmir? e Ki bann defi pour bann fanmir Seselwa ozordi?

I ti demann bann fanmir pour anvoy li zot bann larepons lo en limero whatsapp spesyal ki’n ganny met anplas e sa se 2520828.

Portparol Legliz Katolik, Norlis Rose Hoareau, in dir yer ki Monsenyer Harel in vreman enpresyonnen par kalite larepons ki bann fanmir in kontribye.

“Dimoun in vreman partisip tre aktivman e Monsenyer in ganny plis ki en santenn larepons sorti kot bann fanmir ziska prezan e i tre satisfe e tre enpresyonnen par kalite bann larepons akoz bann fanmir in byen reflesir lo zot larepons,” Msye Hoareau i dir.

Avek tou sa bann kontribisyon Msye Hoareau i dir Monsenyer pe finaliz sa trwazyenm sapit son let pastoral avek tit ‘Pti Lepa, Pti Lepa’.

Msye Hoareau i dir let pastoral Monsenyer Harel pou annan plizyer sapit e i ekspekte klotire avek Lazournen Lafanmir lannen prosenn e a sak fwa bann fanmir pou annan diferan kestyon ki i pou donn zot pour reflesir lola.

 

Marie-Anne Lepathy

 

More news