Zenn artis lo Praslin i demontre zot talan atraver en legzibisyon |07 June 2021
Selebre lazournen enternasyonal pou bann zanfan i osi vedir valoriz sa kantite talan ki zanfan Seselwa i annan e donn zot plis loportinite pour devlope.
Sa i mesaz ki en lorganizasyon non-gouvernmantal baze lo Praslin, Unique Foundation, pe pase atraver en legzibisyon lar ki demontre travay bann zenn artis lo Praslin.
Sa legzibisyon ti fer kot batiman Fon Pansyon Praslin e answit ganny mete kot lotel Le Duc de Praslin kot i pou reste pour en semenn pour bann kliyan ek piblik vwar.
Sa lorganizasyon ti apros en artis Pralinwa, Msye Cyril Jean, pour fasilit sa proze. Msye Jean i osi en manm komite lasosiasyon lar (pARTfe). Sa proze ti lanse le 14 Desanm 2020 e zanfan in fer zot travay kot lakour pandan letan restriksyon kot ti napa lekol.
Bann materyo pour penn ti ganny fourni par Unique Foundation apre ki zot ti’n ganny en lasistans avek Special Children’s Fund an 2018. Materyo ki zot in aste pour en tel proze i pour en peryod 2-an. Sa i enn parmi bann proze ki Unique Foundation pe fer anba zot progranm ‘Positive Youth Development’.
Sa lorganizasyon i krwar dan rekonnet talan bann zenn e donn zot plis loportinite ensi ki fer lezot dimoun vwar dan ki zot annan lentere pour donn zot plis sans devlope.
Ansennyan lar dan lekol lo Praslin in osi ede, espesyalman Mis Chantal Roseki, en ansennyan lekol primer Baie Ste Anne. Ansanm avek lezot volonter Unique Foundation ki doue dan lar, Loua ek Maryline Paunikar ki pou kontiyen fasilit sa proze, bann aktivite pou kontinyen.
Konsey Nasyonal pour Lar (NAC) i siport en tel linisyativ e i pou donn son sipor bann aktivite lar ek lanmizik ki i pou fer an partenarya avek sa fondasyon e osi pARTfe alavenir.
Unique Foundation i antisipe ki sa proze i kontinyen menm apre sa 2-an e i swete ki en tel proze a grandi pour ki Praslin i ganny li en lakademi lar pour bann zenn kontinyen devlop zot talan artistik e kreativ ki osi enbon terapi.
NAC i ankouraz bann zanfan pour kontinyen devlop zot talan artistik.
Bann portre ki akonpanny lartik i montre serten travay sa bann zenn artis ki dan legzibisyon.
En kontribisyon
