Santer e mizisyen Raymond Barra i kit nou |07 June 2021
Raymond Barra
Renonmen pour son bann sanson tel konman ‘Lakle Lo Latab Ronn’, veteran dan lanmizik, Raymond Barra, in kit nou Sanmdi apremidi.
Sa santer e mizisyen tre popiler, sirtou dan bann lannen 1980, ti mor lo son zil nesans Praslin apre en batay avek son bann maladi kronik, enn son garson in raporte.
Raymond, ki ti pe reste Amitié lo Praslin, ti’n fek selebre son 78enm lanniverser le 1 Me.
Parmi bann sanson ki ti fer li popiler ti bann tit parey ‘Lakle lo Latab Ronn’, ‘Bel Baba’ ek ‘Mon Ver in Savire’.
Expedite Barra, son garson, i anmenn nou lo en bref parkour lavi Raymond Barra.
«Mon papa ti ne le 1 Me, 1943 e ti grandi lo Praslin. Pour li ganny son lavi, i ti bezwen al travay lo zil ler i ti ankor byen zenn – laz 15-an anmontan.»
«I’n travay lo boukou zil, mon krwar pa si i annan en zil ki i pa’n deza vizite, e se laba ki i ti zwenn mon manman. A en serten pwen zot ti al lo zil Diego kot mon paran ti ganny zot premye zanfan, mon pli gran ser,» Expedite i rakonte.
Apre travay lo zil, Raymond ti zwenn lafors lapolis avek ki i ti deservi bokou lannen konman en zofisye lapolis.
Boner dan bann lannen 1980, Raymond ti kit lafors lapolis e zwenn National Guard kot in travay ziska son retret.
An se ki konsern son karyer lanmizik, Expedite i eksplike ki son papa ti lans son premye albonm an 1983, en albonm ki i ti rikorde avek benn Saturn.
Raymond ti osi en mizisyen e santer ki ti perform dan bann diferan letablisman touristik e dan bann fonksyon.
Me vi ki lafanmiy Barra ti kontinyen agrandi, avek 8 zanfan an total, sis garson e de fiy, Raymond ti dekoste avek lanmizik pour pran ka avek son fanmiy.
«Pour apepre 15 a 20-an, papa pa ti angaz li dan lendistri mizikal. I ti vreman en dimoun lafanmiy e i ti anvi dedye son letan avek son fanmiy. Lavi pa ti fasil e mon manman ti bezwen reste lakaz pour okip nou,» Expedite ti remarke.
«I ti konmans retourn dan lanmizik ler nou ti dan segonder. I’n travay lo diferan konpilasyon sanson enkli ‘Arwi Lontan’ pour Festival Kreol an 2008.»
Raymond in osi pas son lanmour pour lanmizik avek son bann zanfan ki enkli Champion, Ambitious, Phillipe Barra e Humbleman (Expedite).
Expedite ek son bann frer mizisyen ti travay avek zot papa lo en konpilasyon bann sanson Raymond ki zot ti resante.
Expedite i eksplike ki son papa i ankor annan bokou sanson ki in konpoze me ki pa’n zanmen ganny release.
“Mon papa ti en zonm strikt e ti fer sir ki i disiplin nou pour nou swiv sa bon semen e met nou drwat. I ti bon ker e pare pour ede kot i ti kapab. I ti en farser e i ti kontan fer dyok ek tou bann dimoun ki i ti zwenn,” Expedite ti azoute.
Raymond Barra i kit deryer son madanm Marie-Andrée Barra, son 8 zanfan ensi ki son bann pti zanfan ek aryer pti zanfan.
Raymond ek son madanm ti pou selebre zot 50enm lanniverser maryaz le 29 Out sa lannen.
Zournal Seychelles NATION i eksprim senpati avek lafanmir Barra swivan lanmor zot pros.
Elsie Pointe