Mesaz pour Lafet Zanfan par lider parti United Seychelles, Dr Patrick Herminie |01 June 2021
«Tou zanfan i spesyal dan son prop fason»
«Lafet zanfan i ganny selebre partou dan lemonn e Sesel i pa en leksepsyon. Sa lafet ki ganny selebre le 1er Zen i annan pour bi promouvwar lenportans e drwa zanfan dan nenport ki sosyete.
«Nou zanfan Sesel zot sanse akoz zot reste dan enn parmi bann pli zoli pei o monn kot i annan an plas bann lalwa e lenstitisyon ki siport lakoz bann zanfan e atas bokou lenportans lo zot proteksyon e drwa. I malere sepandan pour note ki tou dernyenman sosyete pe negliz son responsabilite anver nou zanfan.
«Lafet zanfan pa sipoze en zour zis pour zanfan selebre me osi en zour pour adilt ek paran fer en refleksyon serye lo ki manyer nou kapab promot byennet bann zanfan. I vreman tris ki ozordi i annan zanfan ki ankor pe ganny abize fizikman e mantalman e pe ganny bokou difikilte pour ganny en repa par zour. Dan laplipar ditan sa bann labi i rezilta bann aksyon kalkile bann adilt.
«Tou zanfan i spesyal dan son prop fason. I enportan ki nou revwar lafason ki nou tret nou zanfan. E menm pandan sa letan kovid byennet nou zanfan i dwatet vin nou priorite nimero enn. Annou tret zot byen e montre zot ki zot pe ganny apresye, pe enport zot kouler, ras, relizyon.
«Anou fer sakrifis ozordi pour asire ki nou zanfan i ganny en meyer demen. Nou bezwen kontinyen zwe nou vre rol konman edikater e protekter nou bann zanfan. Tandis ki i vre ki nou pa zanmen kapab sirvey nou zanfan a tou moman, me kalite ledikasyon e latansyon ki nou donn nou zanfan i sifizan pour ed zot pran bann bon desizyon e konpran diferans ant byen ek mal.
«Annou montre nou zanfan bann meyer valer lavi, ki ava ed zot pour apresye zot menm e respekte e apresye lezot. Fodre pa ki nou oubliye ki nou rekolte sa ki nou senmen.
«Sa zour spesyal annou osi selebre linosans nou bann zanfan. Annou fer zot resanti ki zot presye e ganny apresye dan tou fason akoz nou lavenir i depan lo zot. Se zot bann dirizan demen.
«Lo mon prop non e lo non United Seychelles, mon pe demann tou zanfan Sesel pour zot osi pran zot responsabilite e apresye bann loportinite, sirtou dan sa moman difisil ki nou pei pe pas atraver. Pour sa zour spesyal, e pour lannen antye, nou swet zot bokou lazwa, ki zot fitir i enn ki briye e ki zot vin en lalimyer pour sa monn.
«Bonn fet tou zanfan.»