En lot miner i vin viktim labi seksyel |07 May 2021
En zonm dan son 20enn lannen in ganny anmenn devan Lakour Siprenm Mardi sa semenn konman sispe pour lofans labi seksyel lo son pti frer ki ankor miner.
Sete Lotorite Servis Sosyal ki ti enform lapolis lo sa ka semenn pase apre ki zot manman ti’n raport sa lensidan boulversan avek sa lotorite.
Younit ‘Child Protection’ dan lapolis pe kontiny lanket dan sa ka.
Apre pas an kour Mardi, sa sispe ti ganny large lo serten kondisyon tel ki pey en kosyon 10,000 roupi, siny en lot kosyon 25,000 roupi pour li pa kit Sesel, pour pa enterfer avek son viktim e osi temwen dan sa ka.
Lezot kondisyon i pour kit sa lakour, pa vin dan landrwa kot son viktim i reste, pour pa komet en lot tel kalite lofans e finalman pour siny liv lakour kot lapolis tou le semenn.
Swivan sa lensidan, bann lotorite konsernen pe ankor enn fwa lans lapel for avek tou paran dan Sesel pour vin pli vizilan e atantif pour konpran e konnen ki pe pase dan zot lakour an relasyon avek nenport form labi sirtou labi seksyel.
Nenport sitwayen ki konn ka ki pe arive pe ganny konseye pour alert lotorite konsernen.
Kominike lapolis