Zofisye ANB i kontiny zot bann lafouy |05 May 2021
Biro Anti-Narkotik (ANB) dan Lafors Lapolis Sesel in semenn pase fouy lo 255 dimoun, dan 22 lakaz e dan 18 transpor.
Sa bann lafouy in fer ki 21 sispe in ganny arete lo Mahé, Praslin ek La Digue an relasyon avek lofans ki relye avek en drog kontrole. Parmi sa bann sispe ki ti ganny arête i en fermye (en zonm) ki reste Val d’Andorre e aze 46-an e son garson, li osi en fermye, aze 20-an. Zot ti ganny arete le 1 Me 2021 kot zot lakour par bann zofisye lapolis ‘Dog Unit, an posesyon apepre en total 824 granm rezin kanabis e apepre 1.61 granm sispekte eroin.
Sa ka in evantyelman ganny transfer avek ANB pour plis lanket e prosedir prosekisyon atraver Biro Prokirer Zeneral.
E Lendi le 3 Me 2021, toulede sispe in ganny rimann pour 14 zour, apre ki zot in pas devan Lakour Mazistra. Zot pe fer fas avek sarz pour lofans trafik en drog kontrole e zot pou retourn davan lakour le 17 Me 2021.
Apard ki dan sa enn ka, ANB in osi kapab sezi en total 58.55 granm rezin kanabis, 58.49 granm zerbaz kanabis e 32.66 granm eroin ki ti dan posesyon lezot sispe kot in fer lafouy.
Kominike sorti kot Biro Anti-Narkotik