Lazournen Travayer SLU i swet bonn fet tou travayer Seselwa |30 April 2021
Dan en mesaz ki in anvoy pour tou travayer Seselwa alokazyon Lazournen Travayer demen le premye Me, tyermenn Linyon Travayer Seselwa (SLU), Ralph Volcère, in eksprim swe ki tou travayer i ava pas en bon moman e ki zot ava osi pran sa lokazyon pour reflesir enpe lo zot prop sitiasyon e lo sitiasyon travay an zeneral dan pei.
I dir sa lannen i enn ki’n konmans avek bokou defi e pou annan ankor bokou difikilte pour nou fer fas avek.
«Lefe sa pandemik Kovid-19 lo nou pei ek sosyete e nou lekonomi in enn ki’n anmenn en kantite problenm pour nou tou. Ozordi travayer pe fer fas avek perdi plas travay, avek pran mwen saler pour menm travay akoz anplwayer napa le mwayen e i nepli annan lasistans pour bann biznes kapab pey zot travayer.
Anmezir ki loportinite travay i redwir, pri lavi i kontinyen ogmante e traka i akimile lo latet sa per e merdfanmir,» Msye Volcère i dir dan son mesaz.
«SLU i dir avek ou ki ou pa tousel e ki parey dikton i dir ‘Linyon i Fer Lafors’. A lokazyon sa lazournen enternasyonal pour travayer, SLU i demann ou sa travayer pour vin zwenn sa linyon e ou pou toultan annan en dimoun a lekout, en landrwa kot ou kapab ganny en sipor e en reprezantasyon,» Msye Volcère i dir.
«Anvi difikilte dan marse lanplwa aktyel, i neseser ki travayer i met li azour avek bann lalwa ek regilasyon ki gouvern travay dan nou pei. San travayer napa lekonomi, napa devlopman e si en travayer i pa serye i pa selman retard son lekor me en lasosyete an antye. Met ou target ek ou bann lanbisyon, devlop en plan e travay pour akonplir sa bann bi.
«I enportan ki nou pran nou responsabilite e sezi tou loportinite ki nou gannyen pour progrese. Pa les lavi kit ou deryer akoz napa remed pour regre.
«Ou anplwayer i bezwen ou e ou, ou bezwen sa lanplwa ki li in donn nou.
«Alors i neseser ki toulede kote i zwenn kanmarad e fer keksoz marse. Konn ou drwa e pran ou responsabilite.
«SLU i demann tou anplwayer pour vreman valoriz zot bann anplwaye akoz se zot ki kree larises bann lantrepriz. Rekonnet zot travay dir, rekonpans zot e pey zot en saler ki donn zot zot dignite.
«SLU i demann gouvernman pour servi bann striktir anplas pour defann lentere travayer Seselwa e pour vreman met Seselwa premye dan sak loportinite travay ki annan. Linyon i demande ki lotorite konsernen i vin pli serye avek bann size parey permi travay e ki zot met bann mezir anplas pour permet travayer Seselwa epanouir akoz se zot ki moter devlopman.
«Ozordi plis ki zanmen, sekirite dan travay i enportan. SLU i lans en lapel avek tou anplwayer pour fer sir ki tou bann regleman e prosedir proteksyon kont Kovid-19 ki lotorite lasante in met anplas i ganny enplimante e respekte dan landrwa travay.»
Ralph Volcère
Tyermenn Linyon Travayer Seselwa (SLU)
