Follow us on:

Facebook Twitter LinkedIn YouTube

Domestic

5 sispe pe rimann an relasyon avek lofans vol an servan vyolans |27 April 2021

Lapolis in raporte ki 5 zonm sispe – en zofisye ANB avek 4 sivilyen – in ganny arete e pe ganny detenir an relasyon avek lofans vol an servan vyolans raporte arive dan zanmerant simityer anmontan Mont Plaisir Zedi swar.

Lapolis ti ganny enformen lo sa lensidan ver 9:40.

Viktim dan sa ka i en zonm 23-an ki reste Mont Plaisir. I dir letan i ti pe al se li dan son loto, en lot loto ti swiv li, ‘overtake’ e aret li. De (2) zonm ladan ti fors li debarke dan son loto, fer li dormi ater, ‘spray’ gaz lakrimozenn (tear gas) dan son figir e pran son loto al avek.

Sa viktim i dir ki enn son agreser ti arme avek gran kouto ki i ti tap lo son loto.

Loto sa viktim ti plitar ganny trouve andomaze Kap Bonmzan.

Dapre viktim, en sonm 8,500 roupi, avek 2 telefonn portab, in ganny vole dan son loto.

Swivan lanket anmennen par lapolis, sa zofisye ANB ki ti’n fini travay sa zour Zedi “off duty” avek en sivilyen ti ganny arete son landmen Vandredi e ganny anmenn ankour menm zour apremidi kot zot ti ganny rimann.

Sa 3 lezot sispe sivilyen ki ti ganny arete pandan wikenn in ganny anmenn ankour yer bomaten. Enn parmi in ganny rimann ziska le 5 me, tandis ki sa 2 lezot ti repas ankor ankour yer apremidi kot zot in ganny rimann ziska le 10 Me.

Sa 2 sispe ki ti ganny rimann Vandredi ti osi repas ankour yer apremidi kot zot osi zot in ganny rimann ziska le 10 Me.

Antretan, sa sispe ki’n ganny rimann ziska le 5 Me, apre ki i pou repas ankour sa dat (le 5 Me), i ekspekte rezwenn son 4 lezot akonplis letan zot tou zot pou repas ankour le 10 Me.

CID i kontinyen avek son lanket dan sa zafer.

 

Kominike Lapolis

 

 

 

 

 

 

More news