Lakour Siprenm i pas santans dan en lot zafer drog |27 April 2021
Natasia Chang-Tave
Lakour Siprenm in semenn pase kondann Steve Percy Chang-Tave, en zonm Seselwa aze 48-an ki ti reste dan sou-distrik Brilliant e ki ti travay dan en biznes lwe loto.
Steve Chang-Tave in ganny en santans 4-an prizon separeman pour de lofans (en total 8-an prizon) apre ki i ti’n pled koupab preski tar pandan letan ki sa ka ti pe ganny ekoute pour sarz ki ti’n ganny enpoze lo li pour sa bann lofans swivan : trafik en drog kontrole e pour ede fasilit trafik en drog kontrole, en total 2.56kg eroin avek en konteni pirite 676.24 granm eroin.
Steve Chang-Tave, ki premye sispe dan sa ka, ti komet sa bann lofans an Out 2019.
Sa bann lofans ti enplik son madanm Natasia Samenta Chang-Tave, dezyenm sispe dan sa ka, ki pe deza deservi en term 6-an prizon depi Septanm 2020 pour preski menm sarz ki son mari.
Term prizon Steve Chang-Tave pou mars ansanm, vedir i pou fer 4-an dan prizon e letan ki in fer an rimann (depi Out 2019 ziska son kondannasyon) pou ganny retire lo son term prizon.
Toulede, Steve Chang-Tave ek son madanm Natasia Chang-Tave, ti ganny arete par zofisye Biro Anti-Narkotik (ANB) dan Lafors Lapolis Sesel an Out 2019.
Kominike sorti kot ANB
