US i kondann desizyon pour ferm supermarket STC lo Mahé, Praslin ek La Digue |21 April 2021
Parti United Seychelles in dir ki i kondann san rezerv desizyon gouvernman ek nouvo bord STC pour ferm supermarket STC Victoria, Grand Anse Mahé, Grand Anse Praslin ek La Digue.
“United Seychelles i krwar ki sa desizyon in ganny motive par bann gro marsan ki bokou zot ti sponsor LDS dan dernyen eleksyon e i tonm anliny ek prensip liberal nouvo gouvernman – ki krwar dan en lekonomi kapitalis sovaz kot bef dan disab, sakenn vey son lizye,” US i dir dan en kominike.
«United Seychelles i oule fer gouvernman rapel ki manda orizinal STC sete pour stabiliz pri e fer komodite vin pli abordab pour Seselwa sirtou pour bann ki pli vilnerab. I ti osi garanti travay pour plizyer santenn travayer Seselwa,» sa kominike i azoute.
US i dir ki desizyon gouvernman pour ferm STC lo Mahé, Praslin ek La Digue i osi vin a en moman kot Seselwa pe soufer an rezilta revizyon URS, FA4JR, Welfare e Dedicated Fund e kot pri komodite dan laboutik “in tous plafon”.
“United Seychelles i panse ki gouvernman pa’n pran an kont spesifisite Praslin ek La Digue kot STC ti pe garanti ki pri komodite ti reste parey lo Mahé malgre kou transportasyon, e benefis ki sa ti pe anmennen pour bann operater kargo. United Seychelles i atriste par lefe ki fermye sa de zil pou aprezan napa en outlet pour
vann zot komodite,» kominike US i dir.
«United Seychelles i krwar ki deklarasyon gouvernman pour rod lanplwa pour bann travayer STC ki pe perdi zot travay i zis en bat latet dan sa lanvironnman mank lanplwa ozordi dan Sesel e i oule note ki lo La Digue tousel, plizyer douzenn travayer URS i ankor pe rod travay,” sa kominike i azoute.
“United Seychelles i krwar ki largiman gouvernman ki STC i bezwen fermen akoz i pe perdi preski 5 milyon roupi par an i enn ki debatab e pa konvenkan e en lipokrizi prenan kont ki gouvernman fek depans preski 5 milyon roupi en wikenn pour fer promnen anbasader etranze e plizyer minis,» kominike US i dir.
United Seychelles i osi rezet largiman ki klotir STC pou fer komodite vin pli bon marse akoz leksperyans in montre ki sakfwa in annan liberalizasyon dan lenportasyon komodite, pri komodite dan laboutik prive in monte.
«United Seychelles i panse ki plan gouvernman se zisteman pour ranplas STC par en kartel gro biznes ki pou zis vin abiz lo konsonmater Seselwa parey ti le ka avan 1977,» kominike US i dir.
«United Seychelles i le fer remarke ki sa lanons i al kont promes eleksyon LDS pour pa ferm STC e montre klerman ki sa parti pa'n onnet avek zot prop siporter.
United Seychelles toudmenm pa sirprann avek sa desizyon vi ki opouvwar Sesel ozordi i annan en gouvernman liberal ki enterese zis ek lentere gro biznes e kot sa ki ris ava vin pli ris e pov pli pov,” sa kominike i azoute.
Kominike United Seychelles