Madanm Merancia Esther, en rezidan Grand Anse Praslin, i selebre 100-an |14 April 2021

Madanm Esther zour i ti selebre son 100enm lanniverser (Portre: Nouvel SBC)

Madanm Merancia Esther, en zabitan Grand Anse Praslin, ti selebre son lanniverser 100-an Dimans le 11 Avril.

Ti avek en lanmes aksyon de gras prezide par pret Anglikan Simon Fred kot lakour son garson Jonah Victor, St Joseph ki selebrasyon sa lanniverser tre spesyal ti konmanse.

Pour sa lokazyon Madanm Esther ti antoure par son fanmir ek zanmi pros.

Tre kontan pour arive selebre sa laz, Madanm Esther ki ankor byen for, tre alert e kapab byen koze menm si i pa tro kapab mars byen, ti’n kare kare pour sa lokazyon.

“Mon pa konnen mannyer mon’n ariv sa laz me selman mon byen kontan pour selebre,” Madanm Esther ti dir.

Son fiy, Josephine Esther, enn parmi kat zanfan Madanm Esther, i dir ki son manman i ankor kontan manz son kanz diri toule swar parmi lezot keksoz ankor ki i kontan.

Sa madanm ki reste Amitie i pas bokou son letan asize anba son lavarang kot i get lepasan ek lezalan.

Son carer, Flavy Valentin, i dir Madanm Esther i leve toulezour e i pran son ben limenm si i pa ankor arive e i osi aranz son lili letan ki i esper li arive pour prepar son pti dezennen.

“Madanm Esther i en dimoun ki tre aktiv e menm si i pa tro kapab marse, avek sipor son baton i pou fer bann pti keksoz ki i kapab parey pas balye dan son lakaz,” Madanm Valentin i dir.

Pour son lanniverser i ti ganny bokou kado ek fler e parmi ti en pannyen byen ranpli avek en varyete keksoz manze sorti kot Prezidan Larepiblik ki ti ganny prezante avek li par ladministrater distrik Baie Ste Anne Msye Denis Antat vi ki Grand Anse napa en administrater distrik pour lemoman.

Nou swet Madanm Esther tou de bon e bonn sante pour ki i selebre ankor plizyer lanniverser.

M-A.L