En zonm 31-an i rimann pour plizyer ka vol |14 April 2021

En zonm 31-an ki reste La Louise in ganny anmenn ankour Lendi le 12 Avril swivan son larestasyon kot in rimann konman sispe dan plizyer ka vol ki’n arive semenn pase La Louise, Plaisance ek Les Mamelles, bann distrik  ki tonb dan rezyon Mont Fleuri.

Sa zonm i sispe pour vol en telefonn portab valer 10,000 roupi dan en pick-up  andeor en laboutik Plaisance Dimans le 4 Avril e vol larzan dan en loto ki ti’n park kot lakour en madanm La Louise pandan lannwit le 4 a 5 Avril.

Lezot ka ki’n rimann lola i pour kas lakaz e vol labwason alkolize La Louise le 7 Avril, antre e vol pour en valer plis ki 50,000 roupi bizou dan en lakaz Les Mamelles le 9 Avril kot menm zour swar dan menm distrik i ti kas en apartman e vol en sonm 27,000 roupi an likid ek en tablet valer 200 dolar Ameriken.

Swivan lanket fer dan sa pti lespas letan, lapolis i dir zot annan plis ki ase levidans pour ganny konviksyon dan sa bann ka ki’n anrezistre Stasyon Lapolis Mont Fleuri.

Fodre note ki sa sispe ki fek sorti prizon pe osi ganny ankete dan en lot ka vol raporte arive dan distrik Beau Vallon le 2 Avril.

Dan serten sa bann ka lapolis in egalman remark eleman krim oportinis alor i pe ankor en fwa demann manm piblik an zeneral pour pran plis prekosyon e mezir prevantif avek zot bann propriyete, ki swa dan transpor, kot lakour oubyen kot zot biznes i baze.

Sa sispe ki’n rimann pour 14 zour pou repas ankour le 26 Avril kot i ekspekte ganny formelman sarze pour bann lofans ki in komet.

Kominike Lapolis