Kominike Lapolis 3 zonm i ganny sarze pour lofans vol e andomaz propriyete |10 April 2021

Lapolis in raporte ki sa zonm aze 31-an sorti Beau Vallon, sa enn aze 20-an sorti Rivière Anglaise ek en lot 28-an sorti Roche Caïman ki ti’n ganny arete konman sispe dan lensidan kas omwen 2 transpor e vole ladan Eden Island mwan pase in formelman ganny sarze devan Lakour Siprenm pour lofans vol e andomaz propriyete.

Sa akize 28-an in ganny large akoz in zwenn serten kondisyon enpoze lo li par lakour tandis ki son 2 konpatriyot pe rimann prizon Montagne Posée ziska le 15 Avril zour ki zot tou le 3 pou repas an kour.

Sa akize aze 31-an sorti Beau Vallon ek sa enn 20-an sorti Rivière Anglaise in egalman ganny sarze pour menm kalite lofans raporte arive dan distrik Beau Vallon.

2 akize i ganny sarze pour lofans vol an servan vyolans

Lapolis in egalman raporte ki 2 parmi 3 sispe dan ka kot en zonm dan rezidans dimoun aze Union Vale ti ganny atake e vole son larzan mwan pase in osi ganny formelman sarze sa semenn pour lofans vol an servan vyolans.

Sa 2 akize in ganny rimann prizon Montagne Posée, tandis ki trwazyenm in ganny large san kondisyon.

Sa 2 akize i menm 2 zonm ki ti vol en sak kalen (coins) dan en bis SPTC lo Laveni 5 Zen boner sa lannen.