En bidze 31.907 milyon pour departman Zafer Sosyal |27 March 2021
Minis pour Lanplwa ek Zafer Sosyal, Madanm Patricia Francourt, ek sekreter prensipal pour zafer sosyal Madanm Linda William-Melanie ti dan Lasanble Nayonal yer bomaten pour reponn kestyon bann manm lo bidze departman Zafer Sosyal.
Apre bokou kestyon e plizyer pwen pour klarifikasyon ki bann manm ti leve, sa bidze 31.907 milyon ti ganny laprouvasyon Lasanble.
Ler i ti pe prezant sa bidze Minis Francourt ti fer resorti ki i reprezant en rediksyon 5.9 milyon roupi konpare avek bidze pour lannen pase.
I dir 1.981 milyon, ki konpri saler ek servis, in transfer kot departman Lanplwa pour sekretaryat minis.
Malgre koupir dan son bidze Minis Francourt i dir bidze pour sa lannen i pran kont nouvo bezwen departman Sosyal pour li kapab fonksyonn alaoter.
Sa bidze i osi fer provizyon pour 9 nouvo pos pour travayer sosyal pour travay dan bann distrik kot i annan mankman.
Lo nivo sekretaryat minis i dir provizyon in fer pour en polisi analis sinyor akoz sa departman i bezwen en dimoun avek sa kapasite pour get bann polisi e siport bann travay teknik ki servis sosyal i annan pour fer sirtou kot i konsern bann nouvo sitiasyon ki devlope dan domenn sosyal.
Minis Francourt in enform Lasanble ki sa departman pe al met anplas en nouvo Compliance and Monitoring Unit ki pou responsab pour sirvey bann fwaye pour asire ki zot pe aplik standar ki’n devlope anviron 3-an pase e ki byento pou ganny regilarize anba Children’s Act. Sa younit pou osi responsab pour kordin vetting bann travayer ki pe rod en plas travay dan en landrwa ki donn servis oubyen ofer progranm pour zanfan.
Tousala Minis Francourt i dir i avek bi pour asire ki zanfan i ganny proteze kont okenn danze potansyel par bann adilt ki kapab servi zot landrwa travay pour ganny akse ek zanfan e abiz zot.
Minis in osi dir ki annan en tel younit i en norm enternasyonal e bon pratik ki egziste dan lezot pei e Sesel osi i bezwen bann bon pratik sirtou a en moman kot labi seksyel lo bann zanfan pe kontinyen ogmante.
Minis Francourt ti azoute ki son minister, ki osi responsab pour Lazans Proteksyon Sosyal, in ganny aranze dan en tel fason ki i annan sa bon sinerzi ant bann diferan departman ek lazans pour asire ki tou Seselwa i mentenir en nivo lavi ki permet zot devlope e epanouir.
I dir departman Zafer Sosyal atraver Divizyon Zafer Sosyal i mentenir son manda pour sofgard byennet bann zanfan, fer lenvestigasyon dan bann ka labi e asire ki zot an sekirite, responsab pour sipor Lakour ek Tribinal Lafanmir pour pran bann desizyon ki konsern custody, maintenance e akse zanfan avek zot paran e osi desizyon lo ka adopsyon ki devan Lakour.
Sa departman i osi asiste bann fanmir ki dan difikilte parey konfli familyal, vyolans domestik e osi fasilite lasistans pour bann adilt e bann zenn vilnerab dapre zot bezwen.
Minis ti fer resorti ki departman Lafanmir li i konsantre plis lo progranm ek aktivite ki siport e konplemant travay lentervansyon ki departman Zafer Sosyal i fer.
Malgre ki enn son priyorite stratezik se pour annan en sant pour bann adolesan avek konportman difisil e antisosyal, Minis Francourt i dir ki sa lannen ankor sa departman pa’n ganny bidze pour sa proze.
Lot proze ki sa departman i annan se pour met anplas en Family Crisis Centre avek bi pour donn servis dimoun ki dan bezwen apre 4er e dan wikenn.
“Nou’n konstate ki si ti annan en tel servis anplas, bann diferan partener ti pou kapab pli byen kordin repons ler en zanfan i ganny abize e travayer sosyal e lapolis I bezwen entervenir e osi ler i annan bann ka vyolans domestik kot viktim napa rekour lasistans.
Minis i dir ki son swe se pour ganny en landrwa apropriye pour ofer tou sa bann servis anba en sel twa.
Lo son kote PS William-Melanie in eksprim menm swe ki sa proze, ki dan plan pour en bon pe letan, i ganny bidze neseser pour li ganny realize byento.
Parmi bann kestyon ki bann manm ti souleve ti enkli:
- Nesesite pour anrezistre bann travayer sosyal avan ki zot konmans travay;
- Defi pour ganny ase travayer sosyal kalifye e lo sa pwen minis ti dir ki nou annan bokou travay pour fer pour gid bann zenn e ankouraz zot pour fer en karyer dan travay sosyal;
- Demars par zabitan Baie Lazare kree zot prop sant pour bann manm fanmir ki ganny abize;
- Logmantasyon dan tou kalite ka labi lo zanfan e lo sa pwen Minis Francourt i dir ki tou dimoun i devret santi zot konsernen e pour pran zot responsabilite e raport tou sa ki zot vwar e temwannyen pour ki i ganny adrese o pli vit posib.
Lo son kote PS Melanie in remet lanfaz lo responsabilite bann paran pour pli byen elve zot bann garson pour ki zot pa vin bann abizer ler zot vin bann zonm adilt.
“Ki kalite valer ki nou pe pas avek nou bann garson pour fer ki zot annan respe pour bann zenn fiy ek fanm e osi zanfan? Pour anpese ki labi zanfan i kontinyen,” PS Melanie in dir.
I’n profite pour lans lapel avek bann manm Lasanble pour zot osi vin proaktiv e ed departman Sosyal dan sa lalit.
PS Melanie in fer resorti ki zis pour lannen 2020 in annan 168 ka labi zanfan ki’n ganny raporte e servis sosyal in adrese e refer avek lapolis. E pour Zanvye ek Fevriye sa lannen in annan 10 ka anrezistre me zour an zour i kontinyen annan diferan ka ki ganny raporte e ki pran enpe letan pour bann travayer sosyal etabli son bann sirkonstans avan raport avek lapolis.
Lezot kestyon ti konsern posibilite desantraliz servis night shelter e lo sa pwen PS Melanie ti detay tou bann konstrent ki atase avek en tel propozisyon ki enkli trouv landrwa apropriye, dimoun kalifye pour donn sa servis, kou finansyel pour fourni manze ek lezot nesesite sa bann dimoun parmi lezot ankor.
Bann manm ti annan bokou lezot kestyon ki relye avek travay sa departman ek servis ki i ofer.
Lasanble i aprouv bidze departman Lanplwa pour en sonm 38.491 milyon
Sekreter prensipal pour departman Lanplwa, Jules Baker, ansanm avek Veronique Bresson, director egzekitif dan biro minis, ti zwenn avek Minis Francourt pour reponn kestyon ek klarifikasyon ki bann manm ti annan konsernan bidze sa departman.
“Rol sa departman se pour mentenir en lafors travayer ki prodiktiv e otosifizan pour permet pei devlope e asire ki tou sitwayen i zouir en lanplwa desan e en bon nivo lavi. Avek lefe advers ki Kovid-19 in anmennen lo nou lekonomi i neseser pour annan e mentenir en marse lanplwa ki stab pour ki nou rekiperasyon i reste pozitiv e ki nou bann sitwayen i kapab kontinyen annan abilite pour ganny akse avek son bezwen debaz. Rol departman Lanplwa dan sa laspe i primordyal ki fer ki logmantasyon dan bidze pour sa lannen i neseser.”
Minis i dir pour sa lannen zot in ganny en alokasyon 38.491 milyon roupi konpare avek 25.363 milyon lannen pase ki fer en logmantasyon 13.128 milyon roupi. Sa departman i annan 93 travayer e sa bidze i fer provizyon atraver en sonm 3.959 milyon roupi pour rekrit nouvo travayer.
Minis i dir i annan 17 pos ki vid.
Minis i dir ki pour kapab siport marse lanplwa efektivman fas a sa sitiasyon ekonomik difisil, departman Lanplwa in vin avek serten stratezi a kour e mwayen term ki neseser a sa pwen pour ede minimiz lefe advers ki pandemik Kovid-19 pe anmennen e sa i apard bann lezot plan e aktivite ki’n planifye pour sa lannen.
Serten sa bann stratezi a kour e mwayen term i konm swivan:
- Minister depi konmansman lannen pe kolabor plis avek bann landrwa travay pour promouvwar bann diferan plas travay ki vin lo marse lanplwa alaporte popilasyon atraver televizyon SBC. Ziska prezan minis i dir zot in reisi promouvwar 1239 plas travay;
- Progranm lantrennman resours imen ki ekspekte konmanse ennfwa ki bidze i pare pour donn dimoun ki pe rod en travay loportinite pour ganny en nouvo skil oubyen ranforsi son skil
- Reviz lankadreman ki gid rekritman travayer etranze. Departman in fer en revi lo sa lankadreman ki ti entrodwi an Zen lannen pase ki ti permet serten fleksibilite lo rekritman travayer etranze pour sa sirkonstans ki pei ti pe pas atraver a sa moman kot lemonn ti fermen. Vi ki sitiasyon i aprezan diferan alor i neseser pour revwar sa lankadreman pour fer ki travayer etranze i selman ganny retenir si napa en Seselwa ki kalifye pour fer sa louvraz;
- Demars pour met anplas en sistenm elektronik pour permet quick and easy matching pour dimoun ki pe rod en lanplwa avek bann vacancies ki vin lo marse lanplwa pour fer ki anplwayer pa bezwen esper en kantite letan pour ranpli sa bann pozisyon e travayer lo zot kote i kapab ganny en travay ase vit.
- En plan ledikasyon piblik pe ganny met ansanm pour asire ki dan sa sitiasyon difisil aktyel tou akter konsernen i zwe byen zot rol pour ki zot partisip aktivman pour ede ki nou marse lanplwa i reste dinamik e servi nou popilasyon parey i devret.
Ti annan en kantite kestyon, konsern ek klarifikasyon sorti kot bann manm Lasanble e sa ti enkli kantite dimoun ki pe rod lanplwa par distrik, problenm pour zabitan La Digue ganny en lanplwa kot i annan aktyelman 74 dimoun ki pe rod en lanplwa. Lo sa pwen PS Baker ti fer resorti ki zot rikord i montre ki i annan 318 plas travay aktyelman lo Praslin ek La Digue e osi lo Felisite e i annan parmi sa bann dimoun ki pe rod travay ki pe refize pran serten travay sirtou bann lo zil Felisite.
Lezot kestyon ti konsern rekritman travayer etranze, problenm avek bann travayer enformel, lokalizasyon bann plas travay, nesesite pour annan plis ranforsman bann lalwa travay, konfizyon lo size GOP kot i annan konsern ki i annan lapreferans, dimoun ki pe anrezistre pour en travay me ki pa pe ganny apele pour entervyou, klarifikasyon kler lo ler travay fleksib e nesesite pour etabli en plan kler lo sa size.
Minis Francourt in dir ki zot pe fer serten travay lo sa size e bokou diskisyon ek konsiltayon pe deroule e zot ekspekte prezant en papye lo sa size avek Konsey Minis byento.
Deba lo bidze departman Lanplwa ti ale ziska tar apremidi avan ki bann manm ti vote pour donn zot laprouvasyon.
Marie-Anne Lepathy