Zofisye ANB i fer 16 larestasyon |02 March 2021

Biro Anti-Narkotik (ANB) dan Lafors Lapolis Sesel in pandan sa wikenn e semenn ki’n fek pase fer 16 larestasyon lo Mahé ki relye avek lofans posesyon oubyen trafik en drog kontrole.

Parmi sa 16 sispe prensipal, 4 ladan pe fer fas avek sarz lofans trafik en drog kontrole.

Premye, en zonm 54-an ki drayver taksi ti ganny arete an posesyon apepre 45 granm zerbaz kanabis Mardi le 23 Fevriye 2021 dan distrik Beau Vallon.

Dezyenm, en zonm zournen aze 20-an ti ganny arete apre ki 413 plan kanabis ti ganny trouve kot son lakour Pointe Au Sel Vandredi le 26 Fevriye 2021.

Ankor Vandredi le 26 Fevriye 2021, en trwazyenm zonm, en peser 40-an, ti ganny arete an posesyon apepre 69.68 granm sispekte zerbaz kanabis, dan en transpor Pointe Larue.

E Dimans le 28 Fevriye 2021, en zonm ki ‘casual labour’ avek en lakonpannyen ki donn servis bann bato kargo, ti ganny arete an posesyon apepre 25.84 granm sispekte rezin kanabis e apepre 18.45 granm sispekte zerbaz kanabis, Belonie.

Apard ki fer larestasyon, zofisye ANB in osi fer lafouy lo 147 dimoun e dan 39 lakaz. Dan 3 sa bann lakaz, apard ki sispekte drog kontrole, bann zofisye ANB ti osi sezi en serten sonm larzan ki sa bann sispe pa ti pe kapab donn en rezon valab pour zot posesyon. 8,600 roupi ti ganny sezi kot en lakaz La Misère, 19,375 roupi kot en lakaz Corgat Estate, e Pointe Au Sel kot en lot lakaz e dan en transpor antou 19,925 roupi, 685 Ero, 800 Dolar Ameriken e 25 Liv Sterlen ti ganny sezi pour plis lanket ansanm avek plizyer keksoz elektronik.

Dan sa bann lafouy ki ti ganny fer lo tou le trwa nou bann zil prensipal – Mahé, Praslin e La Digue – zofisye ANB ti osi fouy dan 8 transpor e 2 parmi in ganny sezi pour plis lanket.

Tou sa bann sispe pe fer fas avek prosekisyon pour lofans ki zot in komet.

Kominike sorti kot ANB